Հայաստանի որևէ պաշտոնյա COP-29-ին մասնակցելու հայտ չի ներկայացրել. Արարատ Միրզոյան
ԵՐԵՎԱՆ, 13 նոյեմբերի․/ԱՌԿԱ/․ Հայաստանի Հանրապետության որևէ պաշտոնատար անձ Բաքվում անցկացվելիք COP-29 միջոցառմանը մասնակցելու համար հայտ չի ներկայացրել և չի գրանցվել, ասել է ՀՀ ԱԳ նախարար Արարատ Միրզոյանն այսօր ԱԺ–ում՝ անդրադառնալով այն հարցին, թե Ադրբեջանի ԱԳ նախարար Ջեյհուն Բայրամովի այն հայտարարությանը, թե Հայաստանը համաժողովին մասնակցելու համար գրանցել է իր մի քանի ներկայացուցիչների։
«Չեմ բացառում, որ քաղաքացիական հասարակության ինչ-որ կազմակերպություններ այդպիսի բան արած լինեն, թեև ինձ այդ մասին էլ որևէ տեղեկություն հայտնի չէ։ Բայց եթե դա նկատի ունեն, գիտեք՝ Հայաստանը ազատ, ժողովրդավարական երկիր է, և Հայաստանի Հանրապետության կառավարությունը ոչ ցանկություն ունի, ոչ էլ լծակներ՝ ուղղորդելու կամ կառավարելու այդ կազմակերպություններին»,- ասել է Միրզոյանը։
Նոյեմբերի 11-22-ը Բաքվում անցկացվում է ՄԱԿ-ի Կլիմայի փոփոխության գագաթնաժողովը՝ COP-29։ Հայաստանը գագաթնաժողովի հրավեր է ստացել մի քանի ամիս առաջ, սակայն հանրապետական իշխանությունները դեռ որոշում չեն կայացրել դրան մասնակցելու մասին։
