ԼՂՀ վարչապետը կառավարության նոր անդամներին ներկայացրել է նախարարությունների աշխատակիցներին

ՍՏԵՓԱՆԱԿԵՐՏ, 25 սեպտեմբերի. /ԱՌԿԱ/. ԼՂՀ վարչապետ Արա Հարությունյանը նախօրեին համապատասխան նախարարությունների աշխատակիցներին է ներկայացրել կառավարության նոր անդամներին, հայտնում է ԼՂՀ կառավարության տեղեկատվության և հասարակայնության հետ կապերի վարչությունը։

Անձնակազմերին ներկայացվել են ԼՂՀ կրթության և գիտության նախարար Սլավա Ասրյանը, ԼՂՀ արդարադատության նախարար Արարատ Դանիելյանը, ԼՂՀ առողջապահության նախարար Զոյա Լազարյանը, ԼՂՀ արտադրական ենթակացուցվածքների նախարար Լևոն Մնացականյանը և ԼՂՀ աշխատանքի և սոցիալական հարցերի նախարար Նարինե Նարիմանյանը:

Համատեղ արդյունավետ աշխատանքի համար շնորհակալություն հայտնելով ոլորտների նախկին ղեկավարներին՝ վարչապետը նշել է, որ նրանց գիտելիքներն ու փորձը այսուհետ ևս կօգտագործվեն իրենց ամենօրյա աշխատանքում:

Բարձր ու պատասխանատու պաշտոններում նշանակվելու առիթով շնորհավորելով կառավարության նոր անդամներին` վարչապետը վստահություն է հայտնել, որ բանիմաց և տվյալ ոլորտի հիմնախնդիրներին հիմնականում ծանոթ նորանշանակ նախարարները առկա ձեռքբերումներին կավելացնեն նորերն ու հանդես կգան նորամուծություններով ու նոր աշխատաոճով:

Մասնավորապես, առողջապահության ոլորտում գործադիր իշխանության ղեկավարը համակարգային փոփոխություններ է ակնկալում, իսկ ռազմավարական նշանակության` արտադրական ենթակառուցվածքների ոլորտում` զարգացում, որը կապահովի նաև երկրի ընդհանուր զարգացումը:

Արտադրական ենթակառուցվածքների նախարարությունում վարչապետը ներակայացրել է նաև ԼՂՀ նորանշանակ փոխվարչապետին` Արթուր Աղաբեկյանին, ում անմիջական համակարգմամբ կիրականացվի այս բնագավառի կառավարումը:

Հարությունյանն աշխատակազմին է ներկայացրել  նաև ԼՂՀ ԿԱ անշարժ գույքի և կադաստրի պետական կոմիտեի  նոր նախագահ Կառլեն Պետրոսյանին` նրանից արդյունավետ աշխատանք ակնկալելով նաև այդ ոլորտում: Պետրոսյանը նախկինում զբաղեցրել է ԼՂՀ աևտադրական ենթակառուցվածքների նախարարի պաշտոնը։

Նորանշանակ պաշտոնյաները շնորհակալություն հայտնեցին նախագահին ու վարչապետին նման վստահության համար և հավաստիացրին արդարացնել բոլորի սպասելիքները: -0-