Պատրաստ եղեք շուտով շատ ու քրտնաջան, երկարատև աշխատանքի. Աշոտյանն ազդարարել է Հայաստան–ԵՄ համաձայնագրի ստորագրումը
ԵՐԵՎԱՆ, 24 նոյեմբերի. /ԱՌԿԱ/. ՀՀԿ փոխնախագահ, ՀՀ ԱԺ արտաքին կապերի մշտական հանձնաժողովի նախագահ Արմեն Աշոտյանը շնորհավորել է բոլորին Հայաստան–ԵՄ համաձայնագրի ստորագրման կապակցությամբ։
Այսօր Բրյուսելում ԵՄ «Արևելյան գործընկերության» ծրագրի 5–րդ գագաթնաժողովի շրջանակում Հայաստանն ու Եվրամիությունը ստորագրեցին Համապարփակ և ընդլայնված գործընկերության համաձայնագիրը, որը կողմերը նախաստորագրել են դեռ 2017 թ.–ի մարտի 21–ին։
Փաստաթուղթը ձևավորում է նոր հարթակ Հայաստան–ԵՄ քաղաքական և տնտեսական համագործակցության ամրապնդման համար, որը հիմնված է ընդհանուր արժեքների և սերտ կապերի վրա։
«Համապարփակ և ընդլայնված գործընկերության համաձայնագիրը Հայաստանի Հանրապետության և Եվրոպական Միության միջև ստորագրվեց Բրյուսելում։ Շնորհավորում եմ բոլոր կողմերին և բոլորին», – նշել է Աշոտյանը Facebook–յան իր էջում։
«Պատրաստ եղեք շուտով շատ ու քրտնաջան կարևոր, երկարատև աշխատանքի։ Բայց ոչ այսօր։ Այսօր պարզապես ուրախացեք և վայելեք հանգստյան օրերը», – եզրափակել է Աշոտյանը։–0–
