Հայաստան-Եվրոպական միություն գործընկերությունը հաջողության պատմություն է. Սարգսյան
ԵՐԵՎԱՆ, 29 մարտի. /ԱՌԿԱ/. Հայաստանի նախագահ Սերժ Սարգսյանը գոհունակությամբ է խոսել Հայաստանի և ԵՄ հարաբերության մասին, նշելով, որ 2017 թվականը շատ ակտիվ է սկսվել Հայաստան-Եվրոպական միություն հարաբերությունների տեսանկյունից:
Այդ մասին նա ասել է ԵԺԿ համագումարում, որը կայացել է Մալթայի Հանրապետության Սեյնթ Ջուլիանսի «Ինտերկոնտինենտալ» հյուրանոցի «Արենա» կոնֆերանսների կենտրոնում։
Նա պատմական է անվանել փետրվարին Բրյուսելում նախագահ Տուսկի հետ երկկողմ հարաբերությունները կարգավորող նոր իրավական փաստաթղթի՝ Համապարփակ և ընդլայնված գործընկերության համաձայնագրի շուրջ բանակցությունների ավարտի ազդարարումը:
Նախագահը նշել է, որ մեկ շաբաթ առաջ Երևանում, կողմերը նախաստորագրեցին այն: «Նախատեսում ենք Արևելյան գործընկերության առաջիկա գագաթնաժողովին ստորագրել այս կարևոր փաստաթուղթը՝ ապավինելով նաև մեր գործընկերների աջակցությանը»։
Պետության ղեկավարի խոսքով, ուժի մեջ մտնելուց հետո այն նոր էջ կբացի Հայաստան-Եվրոպական միություն հարաբերություններում՝ ամրապնդելով դրանց ինստիտուցիոնալ հիմքը, ստեղծելով նոր հնարավորություններ մեր գործընկերության ընդլայնման և խորացման համար:
Սարգսյանը հաջողության պատմություն և հաջողված գործընկերության մոդել է անվանել Հայաստան-Եվրոպական միություն գործընկերությունը։ -0-
