ԼՂՀ պաշտպանության նախարար. Մեր սահմանների փոփոխությունը կլինի միայն Ադրբեջանի տարածքային ամբողջականության հաշվին

ԵՐԵՎԱՆ, 4 օգոստոսի. /ԱՌԿԱ/. Մեր սահմանների փոփոխությունը կլինի միայն Ադրբեջանի տարածքային ամբողջականության հաշվին, նախազգուշացրեց Լեռնային Ղարաբաղի Հանրապետության պաշտպանության նախարար, Պաշտպանության բանակի հրամանատար, գեներալ լեյտենանտ Մովսես Հակոբյանը։

«Վերջին իրադարձություններից հետո ադրբեջանցի ժողովուրդը պետք է հասկանա, թե ինչ հետևանքներ կունենա իրենց իշխանությունների ցանկացած արկածախնդրություն` միայն կավելանա կորուստների թիվը, բայց մեր սահմանի փոփոխություններ չեն լինի։ Իսկ եթե լինեն, ապա Ադրբեջանի տարածքային ամբողջականության հաշվին»,– ասել է Հակոբյանն Արցախի հեռուստատեսության եթերում։

Նախարարը միաժամանակ նշեց, որ սպառազինության տեսանկյունից ադրբեջանական կողմը որոշակի փոփոխություններ ունի, իսկ գործողություններում որևէ փոփոխություն ինքը չի տեսնում` «նույն անպատրաստ և անիմաստ գործողությունները, ինչ 1992-1994 թվականներին»։

«Հակառակորդը նույնն է մնում, փոխվել են միայն սպառազինության որոշ տեսակներ, ավելի ժամանակակից են դարձել։ Եվ ինչպես նախորդ պատերազմում, այս մի քանի փոքր դրվագներում նրանք մեզ որոշակի օգնություն են տրամադրել` հատուկ տեխնիկա մատակարարելով»,– ավելացրել է Հակոբյանը։

Վերջին օրերին ադրբեջանական կողմը կտրուկ ակտիվացել է շփման գծում։ Դիվերսիոն գործողությունների և ղարաբաղյան դիրքերի վրա հարձակումների հետևանքով, տարբեր տվյալներով, զոհվել են ավելի քան 25 ադրբեջանցի զինծառայողներ և ԼՂՀ պաշտպանության բանակի հինգ զինծառայողներ։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-