Փաշինյան. Թուրքիայի հետ սահմանի բացումը ընդամենը ժամանակի հարց է
ԵՐԵՎԱՆ, 30 հոկտեմբեր․/ԱՌԿԱ/. Դիվանագիտական հարաբերությունների հաստատումը Թուրքիայի հետ և Թուրքիայի հետ մեր սահմանի բացումը ընդամենը ժամանակի հարց է, քանի որ հիմա որևէ էական խոչընդոտ չկա սահմանի բացման համար, ինչպես նաև դիվանագիտական հարաբերությունների հաստատման համար։
Այս մասին հայտարարել է վարչապետ Նիկոլ Փաշինյանը՝ Փարիզի Խաղաղության 8-րդ ֆորումի շրջանակում անցկացված «Առաջնորդության խաչմերուկներում» խորագրով քննարկման ժամանակ։
«Ես կարծում եմ, որ մենք հասնում ենք մի հանգրվանի, որում կունենանք լիարժեք դիվանագիտական հարաբերություններ, կունենանք բաց սահմաններ, կունենանք տնտեսական, քաղաքական համագործակցություն և կլինենք նորմալ հարևաններ», - ասել է վարչապետը։
Փաշինյանը հայտնել է, որ ինքը հավատում է՝ այդ պահը մոտենում է և շուտով կգա, սակայն չի կարող ասել դրա իրականացման ստույգ ժամկետը։
Նշենք, որ Նիկոլ Փաշինյանը Փարիզի Խաղաղության 8-րդ ֆորումի շրջանակում հոկտեմբերի 29-ի երեկոյան մասնակցել է «Առաջնորդության խաչմերուկներում» խորագրով քննարկմանը:
