Առաջարկվում է ներդնել վարելու իրավունքի դադարեցման ինքնաշխատ համակարգ․ նախագիծ
ԵՐԵՎԱՆ, 10 փետրվարի. /ԱՌԿԱ/. Առաջարկվում է ներդնել վարելու իրավունքի դադարեցման ինքնաշխատ համակարգ։
Այսօր խորհրդարանի հերթական նիստում քննարկվել է «Ճանապարհային երթևեկության անվտանգության ապահովման մասին» օրենքում փոփոխություններ և լրացումներ կատարելու մասին օրինագծի առաջին ընթերցմամբ ընդունելու հարցը։
Հիմնական զեկուցող ՆԳ նախարարի տեղակալ Արմեն Ղազարյանը հայտնել է, որ ներկայումս յուրաքանչյուր վարչական գործառնություն իրականացնելու ժամանակ ՆԳՆ համապատասխան ստորաբաժանումը հարցում է կատարում թմրաբանական և հոգեբուժական հաստատություններից՝ եզրակացություններ ստանալու համար տվյալ անձի սահմանափակումների վերաբերյալ։
«Փոփոխությունն առաջարկում ենք կազմակերպել այն տրամաբանությամբ, որ յուրաքանչյուր անգամ, երբ անձը կգրանցվի, հաշվառված կլինի նմանատիպ հաստատություններում և այդ տեղեկատվությունը կհայտնվի Armed համակարգում, այդ տեղեկատվությունը ինքնաշխատ կերպով կհայտնվի ՆԳՆ էլեկտրոնային ռեգիստրում և մարդու վարելու իրավունքը կդադարի», - ասաց ՆԳ նախարարի տեղակալը։
Ղազարյանը հայտնեց, որ ներկայիս պրակտիկայի շրջանակում 2021-2025 թվականներին նման կերպով դադարեցվել է 2370 անձի վարելու իրավունք։
