Հայաստանի և Արցախի դպրոցներում հոկտեմբերին առաջին անգամ հայերենի մրցույթ կանցկացվի

ԵՐԵՎԱՆ, 11 սեպտեմբերի. /ԱՌԿԱ/. Հոկտեմբերի 30-ին Հայաստանի և Արցախի բոլոր հանրակրթական հաստատություններում առաջին անգամ կանցկացվի «Մեղու. հայերենը բոլորի համար» համադպրոցական մրցույթը, տեղեկացրեցին «Այբ» կրթական հիմնադրամի մամուլի ծառայությունից, որը մրցույթի կազմակերպիչն է:

2009 թ.-ից «Այբ» կրթական հիմնադրամը Հայաստանում և Արցախում մեծ հաջողությամբ կազմակերպում և անցկացնում է «Կենգուրու» և «Ռուսական արջուկ» դպրոցական միջազգային մրցույթները:

«Հաշվի առնելով այս փորձը, ինչպես նաև «Կենգուրու» և «Ռուսական արջուկ» մրցույթների մասնակից դպրոցների ու երեխաների ցանկությունը, ելնելով այն փաստից, որ աշխարհում շատ երկրներ կազմակերպում և անցկացնում են նմանատիպ մրցույթներ տարբեր լեզուներից, «Այբ»-ը ձեռնամուխ եղավ ստեղծել և 2014 թվականից ամեն տարի հոկտեմբերին անցկացնել ևս մեկ նմանատիպ զանգվածային մրցույթ հայերենից», - նշում են կազմակերպիչները:

«Մեղու. հայերենը բոլորի համար» մրցույթին կարող են մասնակցել 3-12-րդ դասարանների բոլոր հետաքրքրված աշակերտները: Մրցութային փաթեթ-հրավերներն արդեն ուղարկվել են Հայաստանի և Արցախի 1224 դպրոցներին: Փաթեթներն ընդգրկում են դպրոցի մասնակցության հայտը, անցկացման մանրամասն կարգը և այլ անհրաժեշտ նյութեր:

Աշակերտների մասնակցության վճարումը կատարելու և դպրոցի ցանկում գրանցվելու վերջնաժամկետը սեպտեմբերի 30-ն է, դպրոցի հայտի ներկայացման վերջնաժամկետը՝ հոկտեմբերի 3-ը:

Մանրամասներին կարելի է ծանոթանալ www.meghu.am կայքէջում:-0-