Հայաստանի առողջապահության նախարարությունը ողջունում է մասնագիտական միավորումների ստեղծումը
ԵՐԵՎԱՆ, 21 մայիսի. /ԱՌԿԱ/. Հայաստանի առողջապահության նախարարությունը ողջունում է մասնագիտական միավորումների ստեղծումը երկրում, ասաց ՀՀ առողջապահության նախարար Արմեն Մուրադյանը Հայաստանի կոլոպրոկտոլոգների ասոցիացիայի անդրանիկ նիստում:
«Մասնագիտական միավորումներն ինքնադրսևորվելու հետ մեկտեղ պետք է կատարեն այնպիսի աշխատանք, որը կօգնի մեզ կայացնել միջազգային ստանդարտներին համապատասխան ժամանակակից առողջապահական համակարգ»,- ընդգծեց Արմեն Մուրադյանը` հավելելով, որ նորաստեղծ կառույցից ակնկալվում է ակտիվություն, մանկավարժական և գիտագործնական աշխատանք:
Արմեն Մուրադյանը բուժաշխատողներին ներկայացրեց նաև հանրային առողջապահական ծրագրերը: Նա անդրադարձավ ՀՀ Ազգային ժողովում առաջին ընթերցմամբ անցած «Բնակչության բժշկական օգնության և սպասարկման մասին ՀՀ օրենքում փոփոխություններ և լրացումներ կատարելու մասին» ՀՀ օրենքի նախագծին, որով Հայաստանում ներդրվելու է շարունակական մասնագիտական զարգացման կրեդիտային համակարգը: Նախարարն առաջարկեց մայր բուհում շարունակական դարձնել հանդիպումները` համակարգի խնդիրներն ու ծրագրերը քննարկելու նպատակով:--0--
