Երևանում անցկացվում է World Tourism Communication Forum–ը
ԵՐԵՎԱՆ, 24 հոկտեմբերի․/ԱՌԿԱ/․ Երևանում հոկտեմբերի 23-25-ը տեղի կունենա World Tourism Communication Forum-ը՝ «Tourism Talks: Connecting People, Places, and Perspectives» խորագրով, հայտնում է Զբոսաշրջության կոմիտեն։
Միջոցառումը միավորելու է աշխարհի զբոսաշրջության և հաղորդակցության ոլորտների առաջատարներին՝ քննարկելու, թե ինչպես է ռազմավարական հաղորդակցությունը ձևավորում զբոսաշրջության ապագան։
Ֆորումը կդառնա գաղափարների, փորձի և համագործակցության հարթակ՝ միավորելով պետական, մասնավոր և միջազգային կառույցների ներկայացուցիչներին։
«Այս ֆորումի միջոցով Հայաստանը նպատակ ունի ընդգծել հաղորդակցության կարևոր դերը վստահության կառուցման, ներգրավվածության և կայուն զբոսաշրջության զարգացման գործում», - ասաց Զբոսաշրջության կոմիտեի ղեկավար Լուսինե Գևորգյանը։
Նա նշեց, որ ստեղծվում է գլոբալ հարթակ, որտեղ ոլորտի տարբեր ներկայացուցիչներ կարող են հանդիպել՝ փորձի փոխանակման, համագործակցության ամրապնդման և մարդկանց ու զբոսաշրջային ուղղությունների միջև կապերը խթանելու համար։
