Հայաստանում կհատկացվի 3,6 մլրդ դրամ այն ավիաընկերություններին, որոնք նոր չվերթեր կբացեն դեպի Երևանի և Գյումրու օդանավակայաններ
ԵՐԵՎԱՆ, 28 հոկտեմբերի․/ԱՌԿԱ/․ ՀՀ կառավարությունը նախատեսում է 2026թ․–ին պետական աջակցություն ցուցաբերել այն ավիաընկերություններին, որոնք նոր ուղղություններով չվերթեր կիրականացնեն Երևանի «Զվարթնոց» և Գյումրու «Շիրակ» օդանավակայաններ։ Այս մասին հայտարարեց ՀՀ տարածքային կառավարման և ենթակառուցվածքների նախարար Դավիթ Խուդաթյանն ԱԺ–ում 2026թ․–ի բյուջեի նախագծի քննարկման ժամանակ։
Նրա խոսքով, այս նպատակով պետբյուջեից նախատեսված է ընդհանուր 3,6 մլրդ դրամի (մոտ 9,4 մլն դոլար) սուբսիդավորում։
Խուդատյանը պարզաբանեց, որ սա վերաբերում է այն ավիաընկերություններին, որոնք այս ժամանակահատվածում կբազավորվեն «Զվարթնոց» և/կամ «Շիրակ» օդանավակայաններում։
«Ավիաընկերությունները կկարողանան ստանալ 20,000 դրամ սուբսիդավորում երկու տարեկանից բարձր յուրաքանչյուր ուղևորի համար, որը տեղափոխվել է «Զվարթնոց» օդանավակայան, և 15,000 դրամ սուբսիդավորում՝ «Շիրակ» օդանավակայան տեղափոխված յուրաքանչյուր ուղևորի համար», - նշեց Խուդաթյանը։
Նախարարն ընդգծեց, որ ծրագիրը հասանելի է բոլոր այն ավիաընկերություններին, որոնք համապատասխանում են պայմաններին։
Նա նաև հիշեցրեց, որ աշխարհի առաջատար լոուքոսթերներից մեկը՝ Wizz Air-ը (Հունգարիա), վերջերս բազա է բացել «Զվարթնոց» օդանավակայանում։
