Արտաքին պատկերը լավ տեսք ունի, բայց ներսում կան խնդիրներ․ թվային ֆինանսների փորձագետը՝ ՀՀ–ում կրիպտոարժութային կարգավորման մասին
ԵՐԵՎԱՆ, 4 սեպտեմբերի․/ԱՌԿԱ/․ Խորհրդարանի կողմից ընդունված «Կրիպտոակտիվների մասին» օրենքը կարևոր է և արդիական՝ այն սահմանում է խաղի կանոնները միջազգային մասնակիցների համար՝ բորսաներ, ինստիտուցիոնալ ընկերություններ, բանկեր, թրասթ–ֆոնդեր, բայց կան ներքին հարցեր։ Այս մասին «ԱՌԿԱ» գործակալությանը տված հարցազրույցում հայտարարել է Cilicia բիզնես ակումբի թվային ֆինանսների բաժնի ղեկավար Անդրանիկ Թողրամաջյանը։
«Հայաստանի բանկային համակարգը պահպանողական է, ինչը լավ է, բայց որոշ հատվածներում այն պետք է ավելի լիբերալ լինի։ Հաշվի առնելով արևմտյան չափանիշների ընդհանուր միտումը, կարծում եմ, որ ԱՄԷ-ի, Վրաստանի և Սինգապուրի կարգավորման վրա կենտրոնանալն ավելի լավ կլիներ, քան եվրոպական մոտեցումը, ինչը մեծապես խստացնում է նորմերը և դժվարացնում ստարտափերի կյանքը», – նշել է նա։
Թողրամաջյանը պարզաբանել է, որ եվրոպական մոտեցման բացասական կողմն այն է, որ լիցենզիաներ ստանալու համար կպահանջվի մեծ գումար և ռեսուրսներ, պետք է հետևել բազմաթիվ կանոնների։
«Հաշվի առնելով մեր մտածելակերպը՝ փոխանակման գործառնությունների մեծ մասը գնում է մոխրագույն և սև շուկա», – ավելացրել է նա։
Պատասխանելով այն հարցին, թե ինչ քայլեր պետք է ձեռնարկի պետությունը բարենպաստ էկոհամակարգ ստեղծելու համար՝ փորձագետը նշել է, որ կարգավորողը պետք է ուսումնասիրի այն երկրների գործելակերպը, որոնց հետ Հայաստանը մեծ ապրանքաշրջանառություն ունի։
«Խնդիրը նոր դերակատարներ ներգրավելը չէ, նրանք իրենք կգան, այլ՝ առկա տնտեսական հարաբերությունները ամրապնդելը։ Եվրոպայի հետ բազմատրիլիոնանոց բիզնես չունենք։ Սակայն մեծ շրջանառություն ունենք ԱՄԷ-ի, Իրանի, Եվրասիական և Ասիական երկրների հետ։ Լիբերալ կարգավորումը, հաշվի առնելով մեր փոքր չափերը, թույլ կտար ներգրավել լրացուցիչ կապիտալ և ուղղորդել այդ հոսքերը Հայաստանի միջով», – ընդգծել է նա։
Թողրամաջյանը վստահ է, որ հիմա կարգավորումը չափազանց խիստ է։
«Շատ միջազգային դերակատարներ երկու անգամ կմտածեն մեր շուկա գալուց առաջ։ Շուկան փոքր է, և կարող է պարզվել, որ այստեղ լիցենզիա ընդհանրապես անհրաժեշտ չէ։ Ամերիկայում և Եվրոպայում լիցենզիա ստանալը դժվար է, բայց այնտեղ կան բազմամիլիոնանոց շուկաներ», – նշել է փորձագետը։
«Կրիպտոակտիվների մասին» օրենքի մասին
«Կրիպտոակտիվների մասին» օրենքը Հայաստանում ուժի մեջ է մտել 2025 թվականի հուլիսի 4-ին: Փաստաթուղթը սահմանում է կրիպտոակտիվներով առևտրի, ծառայությունների մատուցման և շուկայի վերահսկողության կանոնները: Նախատեսվող կարգավորող մեխանիզմները թույլ են տալիս շուկա մուտք գործել միայն ստուգված և թափանցիկ ընկերություններին, ինչը պետք է պաշտպանի կրիպտոակտիվների գնորդների իրավունքները և բարձրացնի շուկայի նկատմամբ վստահությունը:
Թողրամաջյանի ամբողջական հարցազրույցին կարող եք ծանոթանալ հետևյալ հղումով
