Հայաստանն ունի մեծ ներուժ միջազգային կրիպտոարժութային շուկաներին ինտեգրվելու համար, բայց անհրաժեշտ է հավասարակշռված, քաղաքականություն․ փորձագետ
ԵՐԵՎԱՆ, 3 սեպտեմբերի․/ԱՌԿԱ/․ Հայաստանն ունի լավ հեռանկարներ և մեծ ներուժ միջազգային կրիպտոարժութային շուկաներին ինտեգրվելու համար, բայց անհրաժեշտ է հավասարակշռված, նպատակաուղղված քաղաքականություն, հայտարարել է Cilicia բիզնես ակումբի թվային ֆինանսների բաժնի ղեկավար Անդրանիկ Թողրամաջյանը «ԱՌԿԱ» գործակալությանը տված հարցազրույցում։
«Դեռևս ամենաբարձր մակարդակով փորձում են այս հատվածը հնարավորինս համապատասխանեցնել եվրոպական չափանիշներին։ Բայց, ցավոք, մենք շուկայի ծավալներով Եվրոպա չենք», – ասել է նա։
Պատասխանելով այն հարցին, թե ո՞ր ոլորտներում են կրիպտոարժույթները առավել արդյունավետ կիրառվում Հայաստանում՝ փորձագետը նշել է պետական գնումների ոլորտը, որտեղ անհրաժեշտ է լրացուցիչ թափանցիկություն, գործընկերների հետ արտահանման-ներմուծման գործունեությունը, որտեղ պահանջվում է գործարքների թվային պատմություն, ինչպես նաև ներդրումների ներգրավումը՝ պարզաբանելով, որ շատերն արդեն կրիպտոարժույթային ներդրումներ են ստանում տարբեր երկրներից։
«Հայաստանն ունի թրեյդինգի շատ ուժեղ դպրոց։ Չնայած երկրի փոքր չափերին, մենք ծանրակշիռ տեղ ենք զբաղեցնում ԱՊՀ-ում կրիպտոթրեյդերների թվով։ Նրանք գրանցում են շատ մեծ ծավալներ, և բոլոր բորսաները գիտեն այդ մասին», – ասել է նա՝ պարզաբանելով, որ խոսքը բազմամիլիոնանոց ծավալների մասին է։
Միաժամանակ Թողրամաջյանը վստահ է, որ Հայաստանը կարող է դառնալ բլոկչեյն տեխնոլոգիաների տարածաշրջանային կենտրոն։
«Մենք չենք կարող դառնալ միայն մեկ ոլորտի կենտրոն։ Անհրաժեշտ է նպատակաուղղված քաղաքականություն՝ բոլոր դերարակատարների մասնակցությամբ՝ սկսած էկոնոմիկայի և ֆինանսների նախարարություններից մինչև Կենտրոնական բանկ և բարձրագույն քաղաքական ղեկավարություն։ Ցավոք, մենք դեռևս բոլորի մոտ չենք տեսնում նման ցանկություն», – եզրափակել է նա։
«Կրիպտոակտիվների մասին» օրենքի մասին
«Կրիպտոակտիվների մասին» օրենքը Հայաստանում ուժի մեջ է մտել 2025 թվականի հուլիսի 4-ին: Փաստաթուղթը սահմանում է կրիպտոակտիվներով առևտրի, ծառայությունների մատուցման և շուկայի վերահսկողության կանոնները: Նախատեսվող կարգավորող մեխանիզմները թույլ են տալիս շուկա մուտք գործել միայն ստուգված և թափանցիկ ընկերություններին, ինչը պետք է պաշտպանի կրիպտոակտիվների գնորդների իրավունքները և բարձրացնի շուկայի նկատմամբ վստահությունը:
Թողրամաջյանի ամբողջական հարցազրույցին կարող եք ծանոթանալ հետևյալ հղումով
