Հայաստանում կրիպտոոլորտի զարգացման հաջողության գլխավոր պայմանը ճիշտ վերահսկողությունն է. AMX-ի գլխավոր տնօրեն
ԵՐԵՎԱՆ, 8 հոկտեմբեր․/ԱՌԿԱ/. Հայաստանում ընդունված «Կրիպտոակտիվների մասին» օրենքի կյանքի կոչման համատեքստում գլխավոր հարցը վերահսկողության հնարավորություններն են՝ հաշվի առնելով մեծ ռիսկերի ծագման հավանականությունը, ասաց AMX-ի գլխավոր տնօրեն Հայկ Եգանյանը «ԱՌԿԱ» գործակալությանը տված հարցազրույցում։
«Օրինակ, եթե զեղծարարություն լինի, արդյոք կարգավորող մարմինը բավարար հնարավորություններ և հմտություններ կունենա՞ հսկողության համար: Արդյո՞ք հսկողությունը կիրականացնի Կենտրոնական բանկը, թե՞ առանձին մարմին կստեղծվի: Ես դա չգիտեմ, բայց կարծում եմ, որ ամենակարևորը հենց վերահսկողության եղանակներն են», - ընդգծեց նա:
Այս առնչությամբ Եգանյանը հայտարարեց, որ եթե նոր ոլորտ ստեղծելիս վերահսկողության համար չկան հմտություններ, գիտելիքներ, փորձ և մարդկային կապիտալ, ապա դա ի սկզբանե անհաջող ոլորտ է։ «Եթե դու ունես օրենք, բայց չունես այն ճիշտ օգտագործելու և հետաքրքրություն առաջացնելու հմտություններ, ուրեմն կա՛մ օրենքը վատն է, կա՛մ դու ես վատ աշխատում հետաքրքրություն ձևավորելու վրա», - պարզաբանեց նա։
Միաժամանակ նա նշեց, որ Հայաստանում կան խելացի կադրեր, հատկապես կրիպտոարժույթների ոլորտում։
«Ես չգիտեմ, թե ով կարգավորի և կվերահսկի երկարաժամկետ հեռանկարում, բայց վստահ եմ, որ եթե մոբիլիզացվի խելացի մարդկանց ներուժը, կարելի է ստեղծել շատ լավ կառույց, որը կկարգավորի ոլորտը», - ասաց նա։
Պատասխանելով հարցին, թե որքանով է եվրոպական մոդելը, որի վրա հիմնված է Հայաստանում ընդունված «Կրիպտոակտիվների մասին» օրենքը, հարմարեցված հայկական ոլորտին, Եգանյանը նման մոտեցումը անվանեց նորմալ։
«Կենտրոնական բանկը ընտրել է ճիշտ ուղին։ Ինչո՞ւ հորինել հեծանիվ, եթե այն արդեն կա», - կարծում է նա։
«Կրիպտոակտիվների մասին» օրենքի մասին
«Կրիպտոակտիվների մասին» օրենքը Հայաստանում ուժի մեջ է մտել 2025 թվականի հուլիսի 4-ին: Փաստաթուղթը սահմանում է կրիպտոակտիվներով առևտրի, ծառայությունների մատուցման և շուկայի վերահսկողության կանոնները: Նախատեսվող կարգավորող մեխանիզմները թույլ են տալիս շուկա մուտք գործել միայն ստուգված և թափանցիկ ընկերություններին, ինչը պետք է պաշտպանի կրիպտոակտիվների գնորդների իրավունքները և բարձրացնի շուկայի նկատմամբ վստահությունը:
Թողրամաջյանի ամբողջական հարցազրույցին կարող եք ծանոթանալ հետևյալ հղումով
