Անտոկոս վարկեր և 50% փոխհատուցում. տավարաբուծության աջակցության նոր պայմանները
ԵՐԵՎԱՆ, 21 մայիսի․/ԱՌԿԱ/․ Կառավարությունն այսօրվա նիստում ընդունեց ՀՀ 2025-2029թթ․-երի տավարաբուծության զարգացման ծրագրում փոփոխություններ և լրացումներ կատարելու մասին նախագիծը։
ՀՀ էկոնոմիկայի նախարար Գևորգ Պապոյանի խոսքով` հանրապետությունում վերջին տարիներին տավարի գլխաքանակի և կաթի արտադրության ծավալների հետ կապված կան որոշակի խնդիրներ։
Մասնավորապես, գործող նախագծով 30% փոխհատուցում էր տրամադրվում Հայաստանից կամ Հայաստանից դուրս մինչև 25 գլուխ տոհմային կենդանի գնելու դեպքում, և 40%`25 և ավելի կենդանու դեպքում։
«Հաշվի առնելով նաև ոլորտի շահութաբերությունը և մի շարք այլ հանգամանքներ, ինչպես նաև մեր նպատակները, որոնք ավելի ամբիցիոզ են, առաջարկում ենք այս նոր նախագծով արդեն փոխհատուցման ծավալը հասցնել 50%-ի` անկախ գլխաքանակից», - ասաց Պապոյանը։
Նախագծով առաջարկվում է նաև մեծացնել աջակցության ծավալները. եթե մինչ այս պետությունը փոխհատուցում էր տրամադրում առավելագույնը 300 տոհմային կենդանու համար, ապա նոր փոփոխություններով այդ թիվն առաջարկվում է հասցնել 1000-ի։
Մյուս փոփոխությամբ առաջարկվում է մեկ տոհմային կենդանու հաշվարկային առավելագույն արժեքը նախորդ ծրագրի 1 միլիոն դրամից բարձրացնել 1,1 միլիոն դրամի։
«Սա որոշակի գնաճային ճշգրտման է ենթարկվել, քանի որ և՛տրանպորտային ծախսերը, և՛ կենդանիների գները որոշակի աճ են արձանագրել», - նշեց նախարարը։
Փոխոխություններ են նախատեսվում նաև վարկային մասով. ներկայումս ֆերմերները հնարավորություն ունեն կենդանիներ ձեռք բերել 2-3% տոկոսադրույքով (ներմուծելու դեպքում` 3%, տեղական շուկայից գնելու դեպքում՝ 2%)։
«Առաջարկում ենք ամբողջությամբ փոխհատուցել, 0% է դառնում, բայց վարկը պետք է լինի ոչ ավելի, քան 14%», - ասաց Պապոյանը։
Բացի այդ, վարկի մայր գումարի մարման արտոնյալ ժամկետը 12-ի փոխարեն կսահմանվի 18 ամիս, ինչը նշանակում է, որ ֆերմերները փաստացի մարումները կսկսեն միայն 18 ամիս անց:
Այս նոր նախաձեռնությունը տարածվելու է 2026 թվականից սկսված հարաբերությունների վրա այն պարագայում, երբ ֆերմերները նախկինում դեռևս փոխհատուցում չեն ստացել։
Նախարարը նշեց, որ նախորդ ծրագրի շրջանակում ձեռք է բերվել 2600 գլուխ բարձրարժեք տոհմային կենդանի, որոնցից արդեն ստացվել է 12 200 գլուխ տոհմային սերունդ։
