Յունիբանկը երկարաձգել է անհուսալի վարկերի տույժ-տուգանքների զիջումը մինչև ապրիլի 1-ը
ԵՐԵՎԱՆ, 22 հունվարի. /ԱՌԿԱ/. Ֆիզիկական անձանց անհուսալի վարկերի նկատմամբ հաշվարկված տույժերի ու տուգանքների զիջման դիմումները կարելի է ներկայացնել Յունիբանկ մինչև այս տարվա ապրիլի 1-ը, հայտնում է բանկի մամուլի ծառայությունը։
Ինչպես նշվում է հաղորդման մեջ, Յունիբանկը որոշում է կայացրել երկարաձգել դիմումների ընդունման վերջնաժամկետը, հաշվի առնելով հաճախորդների` անհուսալի վարկերի մարման նոր ժամանակացույց կազմելու և իրենց պարտավորությունները կատարելու ցանկությունը։ Դրանով իսկ հնարավորություն ընձեռվում հաճախորդներին օգտվել տույժ-տուգանքների զիջման հնարավորությունից նաև այս տարի։
Տվյալ որոշումը վերաբերում է 2018թ. մայիսի 31-ի դրությամբ 271 և ավելի օր ժամկետանց վարկերին, որոնք հաշվարկված են բանկի արտահաշվեկշռում:
Բանկի հաճախորդները դիմումները կարող են ներկայացնել գլխամասային գրասենյակ կամ ցանկացած մասնաճյուղ: Ներկայացված դիմումի համաձայն՝ Յունիբանկը կների տույժերն ու տուգանքները, իսկ վարկի մնացորդի և տոկոսագումարի համար կսահմանի մարման նոր ժամանակացույց:
«Մենք գործընթացը սկսել ենք դեռ անցած տարվա հուլիսից և մեր հաճախորդների խնդրանքով որոշում կայացրեցինք երկարաձգել դիմումների ընդունման ժամկետը մինչև այս տարվա ապրիլի 1-ը: Յունիբանկը դիմումներ ընդունում է ոչ միայն ֆիզիկական անձանց վարկերի մասով, այլ նաև` որոշակի զիջումներ իրականացնում է անհատ ձեռներեցների և ՓՄՁ-ների համար: Մենք միշտ ձգտում ենք ցուցաբերել հաճախորդամետ մոտեցում և հնարավորինս աջակցել հաճախորդներին՝ իրենց պարտավորությունները պատշաճ կերպով կատարելու համար», - նշեց Յունիբանկի Վարչության նախագահի տեղակալ, Իրավական սպասարկման և ժամկետանց պարտավորությունների հետբերման գծով տնօրեն Օվսաննա Առաքելյանը:
Յունիբանկը» հիմնադրվել է 2001 թվականի հոկտեմբերին։ 2002 թվականին ներդրել է «Յունիսթրիմ» համակարգը։ Բանկի հիմնական բաժնետերը «Ռիպատոնսո Հոլդինգզ Լիմիթեդն» է։ 2015 թվականից բանկը վերակազմավորվել է բաց բաժնետիրական ընկերության:–0–
