Հայաստանը հետաքրքրված է ԵՆԲ–ի ՓՄՁ աջակցությանն ուղղված նախագծերով
ԵՐԵՎԱՆ, 8 դեկտեմբերի./ԱՌԿԱ/. Հայաստանն առաջարկում է Եվրոպական ներդրումային բանկին (ԵՆԲ) խորացնել համագործակցությունը` մասնակցելով փոքր և միջին բիզնեսի աջակցությանն ուղղված նախագծերին և ոլորտային ծրագրերին։
Ինչպես «ԱՌԿԱ» գործակալությանը տեղեկացրեցին ՀՀ էկոնոմիկայի նախարարության մամուլի ծառայութունից, այս մասին էկոնոմիկայի նախարար Կարեն Ճշմարիտյանը նախօրեին հայտարարել է Լյուքսեմբուրգում ԵՆԲ նախագահ Վերներ Հոյերի հետ հանդիպման ժամանակ։
Այս համատեքստում կողմերը քննարկել են Հայաստանում խաղողագործության և գինեգործության զարգացմանն ուղղված համատեղ ծրագրի իրականացման հնարավորությունները՝ հիմք ընդունելով ԵՆԲ փորձը Մոլդովայում։
Հոյերը նշել է, որ բանկը կարևորում է ՓՄՁ զարգացմանն ուղղված ԱՊԵՔՍ վարկային ծրագրի իրականացումը Հայաստանում և վերահաստատել ԵՆԲ-ի պատրաստակամությունը ծրագրի արդյունավետ իրականացման հարցում։
Քննարկվել են նաև վերականգնվող էներգետիկայի, մասնավորապես՝ արևային էներգիայի բնագավառում ԵՆԲ կողմից Հայաստանում համապատասխան ծրագրերի իրականացման հնարավորությունները։
Կարեն Ճշմարիտյանը տեղեկացրել է Վերներ Հոյերին, որ վերջերս Լիտվա կատարած այցի շրջանակում այցելել է արևային մարտկոցների ու բարձր արդյունավետությամբ վահանակների արտադրությամբ աշխարհում հայտնի Global BOD Group ընկերություն, որի հետ հայկական Simartek ընկերությունը ստորագրել է արևային էներգետիկայի բնագավառում համագործակցության վերաբերյալ Փոխըմբռնման հուշագիր։ ԵՆԲ նախագահը նշել է, որ բանկը հետաքրքրված է այդ բնագավառում ծրագրերի իրականացմամբ:
Բացի այդ, զրուցակիցները պայմանավորվածություն են ձեռք բերել Հայաստանում 2016 թ.–ի գարնանը կազմակերպել սեմինար՝ նվիրված ԵՆԲ գործիքներին և ԵՆԲ ներգրավվածության բարձրացմանը Հայաստանի ենթակառուցվածքային ծրագրերում, ինչպես նաև մասնավար հատվածում իրականացվող ծրագրերում։
Եվրոպական ներդրումային բանկը ԵՄ–ի բանկերից մեկն է, որ ծրագրերը Հայաստանում ֆինանսավորվում է ԵՄ խորհրդի կողմից`ԵՄ խորհրդի մանդատի և Եվրախորհրդարանի մանդատի հիման վրա «Արևելյան գործընկերություն» ծրագրի գործընկեր երկրների նկատմամբ։ Ըստ մանդատի` 2014–2020 թթ.–ին նախատեսվում է հատկացնել 4,8 մլրդ եվրո բանկային ֆինանսավորման նպատակով` ԵՄ–ի և Արևելյան գործընկերության համար կարևոր նշանակություն ունեցող ծրագրերին աջակցելու համար։–0–
