«Գազպրոմի»` Հայաստանը գազիֆիկացնելու ծրագրերը բնապահպանական կարևոր նշանակություն ունեն. սոցիոլոգ

ԵՐԵՎԱՆ, 27 փետրվարի. /ԱՌԿԱ/. «Գազպրոմի»` Հայաստանի գազիֆիկացման և գազամատակարարման գլխավոր սխեմայի մշակմանը վերաբերող ծրագրերը բնապահպանական կարևոր նշանակություն ունեն, կարծում է «Սոցիոմետր» սոցիոլոգիական հետազոտությունների կենտրոնի ղեկավար Ահարոն Ադիբեկյանը։

Չորեքշաբթի Երևանում «Գազպրոմի» պատվիրակության` Հայաստան կատարած այցի շրջանակում կայացել է վարչության նախագահ Ալեքսեյ Միլլերի և Հայաստանի նախագահ Սերժ Սարգսյանի հանդիպումը, որի ընթացքում կողմերը քննարկել են էներգետիկ ոլորտում համագործակցության հիմնական հարցերը։ Ալեքսեյ Միլլերը և Սերժ Սարգսյանը պայմանավորվածություն են ձեռք բերել Հայաստանի գազիֆիկացման և գազամատակարարման գլխավոր սխեմայի համատեղ մշակման մասին:

«Հայաստանում գազիֆիկացման մակարդակը հասնում է 90 տոկոսի, սակայն մեր շահերից է բխում, որ այս ցուցանիշն աճի։ Որոշ շրջաններում գազի բացակայության պատճառով անտառահատումներ են կատարվում, իսկ գազիֆիկացման դեպքում մենք դրանք կարող ենք փրկել»,– ասաց Ադիբեկյանը` պատասխանելով «Նովոստի–Արմենիա» գործակալության հարցին։

Ըստ նրա` երկրի շրջանների գազիֆիկացումը կնպաստի նաև գյուղատնտեսության զարգացմանը։

Հայաստանում բնական գազի սեփական արդյունահանումը բացակայում է, հանրապետության էներգետիկան գործնականորեն ամբողջությամբ կախված է գազի ներկրումից։ Գազամատակարարումները մինչև Հայաստանի հետ սահմանն իրականացնում է «Գազպրոմ էքսպորտ» ՍՊԸ–ն, սահմանում գազը գնում է «Գազպրոմ Արմենիա» ՓԲԸ–ն։ 2013 թվականին «Գազպրոմ» խումբը Հայաստանին մատակարարել է 1.96 միլիարդ խորանարդ մետր գազ։

«Գազպրոմ Արմենիա» ՓԲԸ–ն բնական գազի մատակարարումներ է ապահովում Հայաստանի ներքին շուկայի համար։ Ընկերությունը զբաղվում է նաև բնական գազի տեղափոխմամբ, պահմամբ, բաշխմամբ և իրացմամբ, Հայաստանի Հանրապետության գազատրանսպորտային համակարգի և ստորգետնյա պահոցների վերակառուցմամբ և ընդլայնմամբ։

2013 թվականի դեկտեմբերին «Գազպրոմն» ու «Գազպրոմ Արմենիան» Հայաստանին 2014-2018 թվականներին ռուսական բնական գազի մատակարարումների վերաբերյալ պայմանագիր են ստորագրել։ Պայմանագրին համապատասխան` Գազպրոմը պարտավորվում է Հայաստան ամեն տարի մատակարարել մինչև 2,5 մլրդ խորանարդ մետր գազ, որի արժեքը կորոշվի գազի ռուսական գնագոյացմանը կից գնի բանաձևին համապատասխան։ -0- -