Հայաստանը բաց է չինական ներդրումների համար. Պապոյանը՝ ՉԺՀ դեսպանին
ԵՐԵՎԱՆ, 17 հուլիսի․/ԱՌԿԱ/․ Հայաստանը բաց է չինական ներդրումների համար, կան անհրաժեշտ նախադրյալներ՝ տնտեսական կապերի հետագա ընդլայնման և խորացման համար, այս մասին ասել է Էկոնոմիկայի նախարար Գևորգ Պապոյանը՝ ՀՀ-ում Չինաստանի դեսպանի հետ նախօրեին կայացած հանդիպման ժամանակ։
Զրուցակիցները քննարկել են համագործակցության հեռանկարային ուղղությունները, այդ թվում՝ B2B ձևաչափով հանդիպումների կազմակերպումը, ավտոմեքենաների, էլեկտրամոբիլների, էլեկտրաշարժիչների և լիցքավորման ենթակառուցվածքների ոլորտներում համատեղ նախագծերի իրականացման հնարավորությունները, գյուղատնտեսության ոլորտում փոխգործակցության ընդլայնումը։
Նախարարը ներկայացրել է նաև ՀՀ ներդրումային քաղաքականության առանցքային ուղենիշները՝ ընդգծելով օտարերկրյա ներդրողների համար ստեղծված բարենպաստ պայմանները։
Քննարկման առանցքային թեմաներից էր նաև ՀՀ կառավարության «Խաղաղության խաչմերուկ» նախագիծը, որը նախարարի գնահատմամբ կարող է դառնալ տարածաշրջանային և լայնածավալ տնտեսական համագործակցության կարևոր հարթակ։ Դեսպան Լի Սինվեյը նշել է, որ Հայաստանը ունի մեծ ներուժ չինական շուկայում ներկայացվածությունը մեծացնելու համար։
Նա նաև ընդգծել է, որ չինացի սպառողների շրջանում մեծ սեր և հետաքրքրություն կա հայկական ապրանքանիշերի՝ մասնավորապես կոնյակի (հայկական բրենդիի), գինու և ծխախոտի նկատմամբ։
Ըստ Armstat.am վիճակագրական ծառայության տվյալների՝ Չինաստանը Հայաստանի արտաքին առևտրային գործընկերների շարքում զբաղեցնում է երկրորդ տեղը՝ զիջելով միայն Ռուսաստանին։ 2025 թվականի հունվար-մայիսին հայ-չինական առևտրաշրջանառությունը կազմել է ավելի քան 956.1 միլիոն դոլար (21.8% անկում 2024 թվականի նույն ժամանակահատվածի համեմատ)։ Հայաստանից Չինաստան արտահանումը կազմել է գրեթե 210.8 միլիոն դոլար (67.8% անկում)։
