ՀՀ ՊԵԿ նախագահը խոսել է Իրանի, Վրաստանի և ԱՄՆ-ի հետ համատեղ նախագծերի մասին
ԵՐԵՎԱՆ, 24 հոկտեմբեր․/ԱՌԿԱ/. ՀՀ ՊԵԿ նախագահ Էդուարդ Հակոբյանը ներկայացրել է մի քանի գործընկեր երկրների հետ միջազգային համագործակցության զարգացումները։
«Հայաստանը և Իրանը ակտիվորեն բանակցություններ են վարում պարզեցված մաքսային միջանցքի համաձայնագրի շուրջ, որը շուտով կավարտվի», - ուրբաթ կայացած մամուլի ասուլիսում ասել է Հակոբյանը։
Նա նաև հայտարարել է, որ քննարկվում է Վրաստանի հետ համատեղ անցակետի ստեղծման հարցը։
«Վրաստանի հետ համատեղ անցակետի հարց ենք քննարկում և աշխատանքային խումբ է ձևավորվել՝ Գոգավան-Գուգուտի հատվածում համատեղ ծառայություն մատուցելու ուղղությամբ»,- նշել է Հակոբյանը:
Հակոբյանի խոսքով, ԱՄՆ-ի հետ էլ մեծ թափով վերսկսվել է գործակցությունը կարողությունների զարգացման, մաքսային համակարգի սարքավորումների ձեռքբերման, ինչպես նաև առանձին խելացի մոնիթորինգային համակարգերի ներդրման ուղղությամբ:
