Քաղաքացու հայտարարագիրը որոշ դեպքերում ինքնաշխատ կերպով կհամարվի լրացված՝ ՊԵԿ-ի կողմից լրացված տվյալների հիման վրա. նոր կարգավորում
ԵՐԵՎԱՆ, 6 հոկտեմբեր․/ԱՌԿԱ/. Կառավարության գործընկերների հետ համատեղ նախաձեռնություն է մշակվել, որը շրջանառության մեջ է դրվելու Քաղաքացիական պայմանագիր խմբակցության կողմից։
ՔՊ խմբակցության պատգամավոր Բաբկեն Թունյանը մանրամասներ է ներկայացրել նախագծից։
Այն քաղաքացիները, որոնք Պետական եկամուտների կոմիտեի կողմից տեսանելի տեղեկատվությունից բացի այլ եկամուտ չունեն, ապա կարող են անգամ մուտք չգործել եկամուտների հայտարարագրման համակարգ: Քաղաքացու հայտարարագիրն ինքնաշխատ կերպով կհամարվի լրացված՝ ՊԵԿ-ի կողմից լրացված տվյալների հիման վրա:
«Պատրաստվում ենք էապես պարզեցնել եկամուտների հայտարարագրման համակարգը և այդ գործընթացը ինչ ունենք այսօր»,-ասել է Թունյանը։
Գործող կարգավորմամբ, ՀՀ քաղաքացիները պետք է մինչև նոյեմբերի 1–ը էլեկտրոնային ստորագրությամբ մուտք գործեն եկամուտների հայտարարագրման համակարգի համապատասխան հարթակ և լրացնեն այդ հայտարարագիրը և հանձնեն։
«Քանի որ հայտարարագրերը ՊԵԿ-ն ինքնաշխատ է լրացնելու, ինչպես այժմ մենք ՊԵԿ-ի գործիքակազմ ենք ավելացնում և հնարավորություն ենք տալիս, որպեսզի ավելի շատ ինֆորմացիա ստանա և կարողանա ավելի ամբողջական լրացնել հայտարարագրերը»,-ասել է պատգամավորը՝ հավելելով, որ եթե քաղաքացին տեսնում է, որ կան բաներ, որոնք պետք է ճշտել կամ ավելացնել, ինքը դա ավելացնում է և հաստատում հայտարարագիրը։
«Երբ քաղաքացին մուտք է գործում եկամուտների հայտարարման համակարգ, տեսնում է այնտեղ ինքնաշխատ լրացված որոշակի տողեր։ Այսինքն այն տեղեկատվությունը, որը ՊԵԿ-ն արդեն ունի, օրինակ` աշխատավարձը, դրանք արդեն լրացված են լինում։ Եթե քաղաքացին տեսնում է, որ կան բաներ, որոնք պետք է ճշտել կամ ավելացնել, ինքը դա ավելացնում է և հաստատում հայտարարագիրը, և այն համարվում է հանձնված։ Եթե համաձայն է բոլոր տվյալների հետ և գտնում է, որ ավելացնելու բան չկա, ապա ուղղակի հաստատում և դուրս է գալիս այդ համակարգից»,-մանրամասնել է պատգամավորը։
Թունյանը նշել է, որ այս դեպքում պատասխանատվություն չի լինի։
«Երբ մարդը հստակ գիտի, որ ինքը ունի եկամուտներ, որոնք ՊԵԿ-ին հասանելի չէին, և ինքը դա պետք է հայտարարեր, բայց չի հայտարարագրել, ապա դրա համար, անկախ հայտարարագրման համակարգից, կա որոշակի պատասխանատվություն»,-պարզաբանել է Բաբկեն Թունյանը։
Պատգամավորի կարծիքով, այս փոփոխությամբ էապես կհեշտանա քաղաքացիների կյանքը, հատկապես այն քաղաքացիների, որոնք տարեց են և եկող տարի պետք է հայտարարագիր լրացնեն։
Պատգամավորը նշել է, որ բացի այդ, քաղաքացիները կարող են օգտվել սոցիալական կրեդիտներից։
«Քաղաքացին կրթության և առողջապահության վրա կատարված ծախսերի փոխհատուցում կարող է ստանալ միայն այն դեպքում, երբ ինքը մուտք կգործի և գոնե կհաստատի այդ հայտարարագիրը»,-եզրափակել է պատգամավորը։
ՔՊ-ն մտադիր է նախագիծն ընդունել արտահերթ ռեժիմով, որ այն ընդունված լինի մինչև նոյեմբերի 1-ը:
