Ռուսական և ղազախական ցորենն Ադրբեջանի տարածքով տեղափոխվում է Հայաստան․ Պապոյան
ԵՐԵՎԱՆ, 5 նոյեմբերի․/ԱՌԿԱ/․ Այս պահին ռուսական ծագման ցորենը ՌԴ-ից երկաթուղով տեղափոխվում է դեպի Հայաստան՝ Ադրբեջանի տարածքով, հայտնել է էկոնոմիկայի նախարար Գևորգ Պապոյանը։
«Նշեմ նաև, որ ղազախական ծագման ցորենը նույնպես ճանապարհին է և մոտ օրերս կհասնի Հայաստան՝ կրկին Ադրբեջանի տարածքով», – նշել է Պապոյանը Facebook–յան իր էջում։
Հոկտեմբերի 21-ին հայտարարվեց, որ Ադրբեջանի նախագահը վերացրել է իր տարածքով դեպի Հայաստան բեռների տարանցման բոլոր սահմանափակումները: Նման ճանապարհով առաջինը Ղազախստսնից դեպի Հայաստան է տեղափոխվում ցորենի խմբաքանակ։
Երևանը ողջունել է Ադրբեջանի ղեկավարի հայտարարությունն՝ ընդգծելով դրա կարևորությունը տարածաշրջանային հաղորդակցությունների բացման, փոխադարձ վստահության ամրապնդման և Հայաստանի ու Ադրբեջանի միջև հաստատված խաղաղության ինստիտուցիոնալացման համար։
