Զինված խումբը հերքում է նախօրեին ոստիկանի սպանության մեղադրանքը
ԵՐԵՎԱՆ, 31 հուլիսի. /ԱՌԿԱ/. «Ամենայն պատասխանատվությամբ տեղեկացնում ենք, որ ոստիկանը մեր կրակոցից չի սպանվել», - 1in.am-ի հետ զրույցի ժամանակ հայտարարել է ՊՊԾ գնդի շենքը գրաված զինված խմբավորման անդամներից Վարուժան Ավետիսյանը:
«Տվյալ վայրը մեզ համար տեսանելի չէ, ամենայն հավանականությամբ, նա սպանվել է հենց իրենց աջուձախ արձակած դիպուկահարի կրակոցից: Չեմ ուզում ասել՝ միտումնավոր, բայց որ մեր կողմից չի եղել, վստահեցնում եմ», - ընդգծել է Ավետիսյանը:
Նախօրեին ոստիկանության տեղեկատվության և հասարակայնության հետ կապերի վարչության պետ Աշոտ Ահարոնյանը հայտարարել է, որ ՊՊԾ գնդի տարածքից զինյալ դիպուկահարի կրակոցից սպանվել է ՊՊԾ գնդից 350-400 մետր հեռավորության վրա, ավտոմեքենայի մեջ գտնվող ոստիկանության զորքերի ծառայողը:
Ընդդիմադիր Ժիրայր Սեֆիլյանի զինված կողմնակիցները հուլիսի 17–ին մուտք են գործել ՊՊԾ գնդի տարածք։ Ներխուժման ժամանակ զոհվել է գնդապետ Արթուր Վանոյանը։ Մարմնական վնասվածքներով հիվանդանոց է տեղափոխվել վեց մարդ` հինգ ոստիկան և զինված խմբի անդամներից մեկը։
ՊՊԾ գնդի շենքը զավթած անձինք պահանջում են ազատ արձակել Ժիրայր Սեֆիլյանին, ով կալանավորվել է շուրջ մեկ ամիս առաջ մի խումբ անձանց կողմից զենք ապօրինի պահելու կասկածանքով։ -0-Ծանոթացեք լուրերին առաջինն ու քննարկեք դրանք մեր Telegram-ում
12:27 31.07.2016
