Երևանի ծայրամասերից մեկում բռնկված հրդեհի հետևանքով ծանր այրվածքներ ստացած կինը մահացել է

ԵՐԵՎԱՆ, 11 փետրվարի. /ԱՌԿԱ/. Նախօրեին Երևանի ծայրամասերից մեկում բռնկված հրդեհի հետևանքով ծանր այրվածքներ ստացած կինը չորեքշաբթի մահացել է, «Նովոստի–Արմենիա» գործակալությանը տեղեկացրեցին Այրվածքների հանրապետական կենտրոնից։

Հայաստանի քննչական կոմիտեի հաղորդագրության համաձայն`2015 թվականի փետրվարի 9-ին՝ ժամը 05։20-ին Գյուլիքևխյան փողոցի 23/1 շենքի թիվ 48 բնակարանում տեղի է ունեցել հրդեհ, որի հետևանքով նույն բնակարանի բնակչուհի, 1968 թվականին ծնված Աննա Բադալյանը՝ «ամբողջ մարմնի այրվածք 4-րդ աստիճանի» և վերջինիս անչափահաս, 9-ամյա որդին՝ «բաց գանգուղեղային վնասվածք և մարմնի տարբեր մասերի հատվածների այրվածք» ախտորոշումներով տեղափոխվել են բժշկական կենտրոն։

Այրվածքների հանրապետական կենտրոնից տեղեկացրեցին, որ երեխան բուժվում է Երևանի «Էրեբունի» բժշկական կենտրոնում։

Դեպքի առթիվ ՀՀ քննչական կոմիտեի Երևանի քննչական վարչության Ավան և Նոր Նորք վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասի եւ 185-րդ հոդվածի 2-րդ մասի 1-ին կետով (ունեցվածքի դիտավորյալ ոչնչացում կամ վնասում հրկիզման միջոցով)։

Կատարվում է նախաքննություն, ձեռնարկվում են անհրաժեշտ քննչական և օպերատիվ-որոնողական միջոցառումներ՝ դեպքի բոլոր հանգամանքները պարզելու, բազմակողմանի հետազոտումն ապահովելու ուղղությամբ։–0–