Զինվորական ծառայությունից խուսափող իրանցին ապօրինի հատել է Հայաստանի սահմանը
ԵՐԵՎԱՆ, 15 հոկտեմբերի. /ԱՌԿԱ/. Հոկտեմբերի 14-ին Արտաշատի սահմանապահ ջոկատներից մեկում պետական սահմանի պահպանության տեխնիկական միջոցներից տագնապի ազդանշան է ստացվել, հայտնում Հայաստանում ՌԴ դաշնային անվտանգության ծառայության սահմանապահ վարչության մամուլի ծառայությունը։
Տագնապի ազդանշանը ստանալուց մի քանի րոպե անց միջադեպի վայր է հասել սահմանապահների տագնապային խումբը և հայտնաբերել դեպի Հայաստանի Հանրապետության տարածք խորացող հետքեր:
Նշվում է, որ որոնողական աշխատանքների համար օգտագործվել է ծառայողական շուն, որը կարճ ժամանակում հայտնաբերել է սահմանախախտին:
Սահմանապահները նրա մոտ անձը հաստատող փաստաթղթեր չեն հայտնաբերել: Նախնական տեղեկություններով սահմանախախտը Իրանի Իսլամական Հանրապետության քաղաքացի է:
Նա հայտնել է, որ սահմանը հատել է զինվորական ծառայությունից խուսափելու համար:
Ռուս սահմանապահները նրան փոխանցել են Հայաստանի իրավապահ մարմիններին:–0–
