Հայաստան կժամանի ՌԴ քննչական կոմիտեի նախագահը
ԵՐԵՎԱՆ, 19 հունվարի. /ԱՌԿԱ/. ՀՀ քննչական կոմիտեի նախագահ Աղվան Հովսեփյանի հրավերով երկուշաբթի Հայաստան կժամանի ՌԴ քննչական կոմիտեի նախագահ Ալեքսանդր Բաստրիկինը, հայտնում է գերատեսչության մամուլի ծառայությունը։
Հաղորդագրության համաձայն` նման պայմանավորվածություն է ձեռք բերվել երկուշաբթի Հայաստանի և Ռուսաստանի ՔԿ–ների ղեկավարների հեռախոսազրույցի ընթացքում։
«Կողմերը քննարկել են հունվարի 12-ին Գյումրիում Ավետիսյանների ընտանիքի 6 անդամների սպանության գործի քննությանը վերաբերող հարցեր, որոնց կատարման մեջ մեղադրվում է Գյումրիում տեղակայված ռուսական 102-րդ ռազմաբազայի զինծառայող Վալերի Պերմյակովը», – նշվում է հաղորդագրության մեջ։
Հունվարի 12–ին Գյումրիում, որտեղ տեղակայված է ռուսական 102–րդ ռազմակայանը, վեց հոգանոց ընտանիք է սպանվել։ Միակ ողջ մնացածը վեց ամսական Սերյոժա Ավետիսյանն է, ով հիմա վերակենդանացման բաժանմունքում է։ Հանցագործության կատարման մեջ կասկածվում է ռուս ժամկետային զինծառայող Վալերի Պերմյակովը, նա ձերբակալվել է երեքշաբթի և ինքնախոստովանական ցուցմունք է տվել։
Հաշվի առնելով քրեական գործի առանձնահատկությունները՝ Հովսեփյանը Բաստրիկինին հրավիրել է Հայաստան։
«Հրավերն ընդունվել է, և պայմանավորվածության համաձայն՝ ՌԴ ՔԿ նախագահն այսօր կգա Հայաստան», – նշվում է հաղորդագրության մեջ։–0–
Ծանոթացեք լուրերին առաջինն ու քննարկեք դրանք մեր Telegram-ում
15:04 19.01.2015
