Փաշինյան–Թրամփ հանդիպումը շարունակում է մնալ մեր երկրի արտաքին քաղաքական օրակարգում. ԱԳ նախարար
ԵՐԵՎԱՆ, 14 օգոստոսի./ԱՌԿԱ/. ՀՀ վարչապետ Նիկոլ Փաշինյանի և ԱՄՆ նախագահ Դոնալդ Թրամփի հանդիպումը շարունակում է մնալ երկրի արտաքին քաղաքական օրակարգում, ասաց ՀՀ ԱԳ նախարար Զոհրաբ Մնացականյանը չորեքշաբթի իր ուրուգվայցի գործընկեր Ռոդոլֆո Նին Նովոայի հետ համատեղ ասուլիսի ժամանակ։
«Շարունակեմ ուշադրություն դարձնել այն փաստին, թե այս ընթացքում որքան ակտիվ էր քաղաքական երկխոսությունն ԱՄՆ–ի և Հայաստանի միջև։ Այս տարվա ընթացքում երկխոսության շարունակությունն ու մակարդակը մեզ համար բավարար են։ Ինչ վերաբերում է հանդիպմանն ամենաբարձր մակարդակում, ապա այն եղել և մնում է մեր օրակարգում։ Համոզված եմ` այդ պահը կգա»,– հայտարարեց նախարարը։
Միաժամանակ նախարարն ընդգծեց, որ եթե գնահատենք հանդիպումների ներկա դինամիկան, ապա ԱՄՆ–ի հետ բարձր մակարդակում քաղաքական երկխոսության որևէ դեֆիցիտ այս տարի չի նկատվում։
«Մենք ունենք բազմաթիվ հարցեր օրակարգում, կան վիճահարույց հարցեր, որոնք վերաբերում են մեր հետագա քայլերին։ Սակայն դա նորմալ է այն բանի տեսանկյունից, որ մենք գործ ունենք երկու գործընկերների հարաբերությունների հետ», – ասաց Մնացականյանը։
Փաշինյան–Թրամփ հանդիպումը նախատեսված էր 2018թ.–ի սեպտեմբերին ՄԱԿ–ի Գլխավոր վեհաժողովի շրջանակում, սակայն չի կայացել երկու երկրների առաջնորդների ծանրաբեռնված ժամանակացույցի պատճառով։–0–
