ՀԱՊԿ–ում Խաչատուրովին փոխարինող են գտել ՀԱՊԿ գլխավոր քարտուղարի պաշտոնում

ԵՐԵՎԱՆ, 5 նոյեմբերի. /ԱՌԿԱ/. Հավաքական անվտանգության պայմանագրի կազմակերպությունում (ՀԱՊԿ) քննարկվում է գլխավոր քարտուղարի նշանակման հարցը։

Գլխավոր քարտուղարի պաշտոնում, ամենայն հավանականությամբ, կնշանակվի Բելառուսի Անվտանգության խորհրդի պետական քարտուղար Ստանիսլավ Զասը։ Այս մասին հաղորդում է «Կոմերսանտը»։

Վերջնական որոշումը ՀԱՊԿ երկրների առաջնորդները կընդունեն նոյեմբերի 8–ին։ Այս պաշտոնի շուրջ ինտրիգը կայանում է նրանում, որ թափուր պաշտոնին հավակնում է Հայաստանը, որի շնորհիվ էլ ազատվել է պաշտոնը։

ՀԱՊԿ հավաքական անվտանգության խորհրդի նոյեմբերի 2–ի որոշմամբ, Յուրի Խաչատուրովն ազատվել է ՀԱՊԿ գլխավոր քարտուղարի պաշտոնից։

Նոյեմբերի 8–ին Աստանայում ՀԱՊԿ անդամ երկրները (Հայաստան, Բելառուս, Ղազախստան, Ղրղըզստան, Ռուսաստան, Տաջիկստան) կանցկացնեն Հավաքական անվտանգության խորհրդի նստաշրջան։ Սպասվում է, որ նստաշրջանի ընթացքում վերջակետ կդրվի ՀԱՊԿ քարտուղարության նոր ղեկավարի նշանակման հարցում։ ՀՀ վարչապետի պաշտոնակատար Նիկոլ Փաշինյանի մամուլի քարտուղար Արման Եղոյանն օրերս հայտարարել է, որ գլխավոր քարտուղարի թեման «միանշանակ կքննարկվի» Աստանայում` նստաշրջանի ժամանակ։

«Կոմերսանտի»` երեք երկրների դիվանագիտական աղբյուրները նշում են, որ ամենայն հավանականությամբ նոր գլխավոր քարտուղարի պաշտոնում հաջորդ երեք տարվա ընթացքում կնշանակվի Բելառուսի ներկայացուցիչը։

Երևանի ընդհանուր իրավասության դատարանը հուլիսի 28-ի լույս գիշերը որոշում է կայացրել ձերբակալել Հայաստանի երկրորդ նախագահ Ռոբերտ Քոչարյանին մարտի 1-ի գործով: Նա մեղադրվում է այլ անձանց հետո նախնական խայմամավորվածությամբ սահմանադրական կարգի տապալման համար: Որպես մեղադրյալ ներգրավվել է նաև ՀԱՊԿ գլխավոր քարտուղար Յուրի Խաչատուրովը, ով ազատ է արձակվել 5 մլն դրամի գրավի դիմաց, և Հայաստանի պաշտպանության նախկին նախարար Միքայել Հարությունյանը, ով այս պահին հետախուզման մեջ է: -0-