Ալեն Սիմոնյանն առաջարկել է Վենետիկի հանձնաժողով փորձաքննության ուղարկել Հայաստանի և Ադրբեջանի սահմանադրությունները
ԵՐԵՎԱՆ, 17 մարտի․/ԱՌԿԱ/․ Կարող ենք Վենետիկի հանձնաժողով փորձաքննության ուղարկենք Հայաստանի և Ադրբեջանի սահմանադրությունները՝ պարզելու, թե ՀՀ Սահմանադրությունում Ադրբեջանի նկատմամբ տարածքային պահանջներ կան, հայտարարել է ՀՀ ԱԺ խոսնակ Ալեն Սիմոնյանը։
«Միշտ կարելի է ասել, օրինակ, ինձ դուր չի գալիս քո մազերի գույնը, կամ դուր չի գալիս քո ձեռագիրը կամ որևիցե բան, բայց պետք է ամեն ինչի տակ հիմնավորում լինի։ Մինչ այս պահը Ադրբեջանի հետ բանակցությունների մեջ մենք փորձել ենք ամեն ինչի տակ հիմնավորում ունենալ, և այդ տրամաբանությամբ ենք իրենց հետ աշխատել։ Կարծում եմ, որ շարունակությունն էլ էլի տրամաբանված և հիմնավորված կլինի», – ասել է Սիմոնյանն այսօր ԱԺ–ում լրագրողների հետ ճեպազրույցում։
Նա նշել է, որ կարող են երկու երկրների սահմանադրություններն ուղարկել Վենետիկի հանձնաժողով և հարց ուղարկել, թող Վենետիկի հանձնաժողով պայմանական ասի՝ նման բան կա, թե ոչ։
