ԱՄՆ-ն ղարաբաղյան հակամարտության կողմերին լուրջ բանակցություններ սկսելու կոչ է անում. դեսպան

ԵՐԵՎԱՆ, 20 օգոստոսի. /ԱՌԿԱ/. ԱՄՆ-ն ղարաբաղյան հակամարտության կողմերին լուրջ բանակցություններ սկսելու կոչ է անում, հայտարարել է ՀՀ-ում ԱՄՆ դեսպան Ջոն Հեֆերնը Youtube-ի իր տեսաբլոգում:

«Այս հակամարտությունը ռազմական լուծում չունի: Մենք կոչ ենք անում երկու կողմերին լուրջ բանակցություններ սկսել: Վրեժն ու հետագա բռնությունն էլ ավելի կբարդացնեն խաղաղ լուծման հետագա որոնման ուղին: Զոհվածների հիշատակը հարգելու լավագույն միջոցը հենց հիմա բախումները դադարեցնելն է», - նշել է դիվանագետը:

Հուլիսի վերջին – օգոստոսի սկզբին ադրբեջանական կողմը կտրուկ ակտիվացել է շփման գծում։ Դիվերսիոն գործողությունների և ղարաբաղյան դիրքերի վրա հարձակումների հետևանքով, տարբեր տվյալներով, զոհվել են ավելի քան 25 ադրբեջանցի զինծառայողներ և ԼՂՀ պաշտպանության բանակի վեց զինծառայողներ։

«Հերթական անգամ ցավակցություն ենք հայտնում վերջին միջադեպերի հետևանքով զոհվածների և վիրավորների ընտանիքներին: Ինչպես նշել է դեսպան Ուորլիքը, սա սառեցված հակամարտություն չէ: Մենք կոչ ենք անում ինչպես Երևանին, այնպես էլ Բաքվին անհրաժեշտ քայլեր ձեռնարկել լարվածությունը նվազեցնելու և հրադադարի ռեժիմը հարգելու ուղղությամբ», - ասել է Հեֆերնը:

Դեսպանը նշել է, որ սպառնալիքներն ու կոշտ հռետորաբանությունը չեն օգնում գործին:

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ.–ի մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան: -0-Ա.Թ.