Հայաստանի երեք դեղագործական ընկերություններ մտադիր են դիմել Առողջապահության նախարարություն` GMP համապատասխանության հավաստագիր ստանալու նպատակով

ԵՐԵՎԱՆ, 9 հոկտեմբերի. /ԱՌԿԱ/. Դեղորայքի արտադրությամբ զբաղվող երեք ընկերություններ մտադիր են առաջիկայում դիմել Առողջապահության նախարարություն` GMP (Good Manufacturing Practice – Պատշաճ արտադրական պրակտիկա) ստանդարտի համապատասխանության հավաստագիր ստանալու նպատակով, «ԱՌԿԱ» գործակալության հարցմանն ի պատասխան հաղորդում է Առողջապահության մամուլի ծառայությունը։

Ավելի վաղ Հայաստանի Գիտությունների ազգային ակադեմիայի Օրգանական և դեղագործական քիմիայի գիտահետազոտական կենտրոնի տնօրեն Վիգեն Թոփուզյանը հայտնել էր, որ Հայաստանի ոչ մի դեղագործական ընկերություն տվյալ հավաստագիրը չունի, սակայն շարունակում է դեղամիջոցների արտադրությունը։ Թոփուզյանի հայտարարությանն ի պատասխան Առողջապահության նախարարությունում նշեցին, որ Հայաստանի բոլոր դեղագործական ընկերություններն օրինական են գործում և ունեն համապատասխան արտոնագիր։

«Մոտ օրերին Հայաստանի կառավարությունը կհաստատի GMP չափանիշների համապատասխանության կանոնների մոնիթորինգի և հավաստագրի տրամադրման կարգը, և փաստաթղթի` ուժի մեջ մտնելուց հետո երեք ընկերություններ կդիմեն նախարարությանը համապատասխան հավաստագիր ստանալու համար»,– ասվում է հաղորդագրության մեջ։

Միաժամանակ մամուլի ծառայությունից չնշեցին այդ ընկերությունների անվանումները` ասելով, որ այդ մասին տեղեկությունն ավելի ուշ կտրամադրվի։

2013 թվականի հունվարից Հայաստանում ներդրվել է GMP դեղորայքի նկատմամբ, իսկ Հայաստանի էկոնոմիկայի նախարարությունը ստուգումներ է սկսել հայկական դեղագործական ձեռնարկություններում` պարզելու համար համապատասխանում է ձեռնարկությունների արտադրանքը  GMP–ի չափանիշներին, թե ոչ։

GMP հավաստագրի վերաբերյալ մամուլի ծառայությունը հայտնեց, որ այդ չափանիշները հաստատվել են Հայաստանի կառավարության կողմից 2010 թվականին և ներդաշնակեցված են եվրոպական չափանիշների հետ։

«Համապատասխան արտադրական պրակտիկան այն երաշխիքն է, որ դեղորայքն արտադրվում և վերահսկվում է աշխարհի զարգացած երկրներում 50 տարիների ընթացքում գործող չափանիշներով։ Հայաստանում 2010-2013 թվականներին արտադրողների և պետկառույցների կողմից GMP ներդրման ուղղությամբ ահռելի աշխատանք է կատարվել»,– ասվում է հաղորդագրության մեջ։

Մասնավորապես, պատրաստվել են իրավական տարբեր փաստաթղթեր, իրականացվել են ոլորտի մասնագետների որակավորման բարձրացման ծրագրեր։

Ներկայում հանրապետությունում գործում է դեղորայքի արտադրության ոչ պակաս, քան երեք ընկերություն։

Հայաստանի ազգային վիճակագրական ծառայության տվյալներով, 2013 թվականի հունվար–օգոստոսին դեղագործական արտադրանքի արտադրությունը կազմել է 3 315.3 մլն դրամ (2012 թվականի նույն ժամանակահատվածի համեմատ աճը` 37,4%)։
 -0-