Նախարար․ Ջերմուկին կհատկացվի 6 մլն եվրո՝ զբոսաշրջային գրավչությունը բարձրացնելու համար
ԵՐԵՎԱՆ, 22 հուլիսի․/ԱՌԿԱ/․ ՀՀ էկոնոմիկայի նախարարությունը նախատեսում է Ջերմուկին հատկացնել 6 մլն եվրոյի լրացուցիչ ֆինանսավորում՝ նրա զբոսաշրջային գրավչությունը մեծացնելու համար, ասել է նախարար Գևորգ Պապոյանը։
«Մեր առաջնային նպատակն է ձևավորել միջավայր, որտեղ զբոսաշրջիկները կունենան հիշարժան և լիարժեք փորձառություն, իսկ գործարարները՝ զարգացման կայուն հնարավորություններ՝ պետության կողմից ցուցաբերվող համապատասխան աջակցությամբ», – նշել է Գևորգ Պապոյանը ՀՀ լավագույն հանգստավայրերից մեկում գործարար համայնքի ներկայացուցիչների հետ տեղի ունեցած հանդիպման ժամանակ։
Ինչպես հայտնում է Էկոնոմիկայի նախարարության մամուլի ծառայությունը, հանդիպման ընթացքում քննարկվել են համայնքի տնտեսական ակտիվության խթանման, զբոսաշրջության զարգացման, ներդրումային միջավայրի բարելավման հնարավորությունները։
Պապոյանը ներկայացրել է Ջերմուկ զբոսաշրջային կլաստերի զարգացման ընթացքը՝ նշելով, որ համայնքը շահառու է դարձել նոր վարկային ծրագրի շրջանակում։
Ավելի վաղ հաղորդվել էր, որ Համաշխարհային բանկը նախատեսում է Հայաստանին տրամադրել 100 մլն դոլար՝ Արենիի, Ջերմուկի, Գորիսի, Դվինի, Շիրակի, Ապարանի, Եղեգիսի, Սևանի, Դիլիջանի համայնքներում զբոսաշրջային կլաստերներ ստեղծելու համար։
TRIP ծրագիրը կիրականացվի 2025-ից 2029 թ.-երին, որն ուղղված է կլաստերներում ընդգրկված տարածքների և համայնքների կենսունակության խթանմանը, զբոսաշրջային գրավչության բարձրացմանը՝ համայնքների համար լրացուցիչ եկամուտների և տնտեսությունների աճի խթանման առումով։
