Շուրջ 10 մլն դոլար՝ Եղեգիսի կիրճում զբոսաշրջային ենթակառուցվածքներ ստեղծելու համար
ԵՐԵՎԱՆ, 6 մայիսի. /ԱՌԿԱ/. Եղեգիսի կիրճում կառավարությունը կներդնի շուրջ 10 մլն դոլար՝ զբոսաշրջային ենթակառուցվածքներ ստեղծելու նպատակով։
Այս մասին Facebook-ի իր էջում տարածած տեսանյութում հայտնել է Էկոնոմիկայի նախարար Գևորգ Պապոյանը։
Նրա խոսքով՝ ներդրումների նպատակն է տարածքը դարձնել Հայաստանի կարևորագույն և գեղեցիկ զբոսաշրջային հանգույցներից մեկը, որպեսզի այն զբոսաշրջիկների, ներդրողների և բնակիչների համար դառնա շատ ավելի հարմարավետ և շատ ավելի եկամտաբեր։
«Այս հատվածում կառուցելու ենք ճանապարհ, որը կմոտեցնի պատմամշակութային վայրերին, մասնավորապես՝ Զորաց եկեղեցուն։ Մեկ այլ հատվածում՝ Սմբատաբերդի հետևի մասից՝ Արտաբույնքից, մտադիր ենք կառուցել ճոպանուղի», - ասել է Պապոյանը։
Նախարարն ընդգծել է, որ առկա են էլեկտրականության և ջրի հետ կապված խնդիրներ, որոնց լուծման ուղղությամբ նույնպես կիրականացվեն ներդրումներ։
«Եղեգիսի կիրճը պետք է դառնա ու վստահաբար կդառնա շատ կարևոր և զբոսաշրջիկներով լեցուն մի վայր», - նշել է Պապոյանը։