Բիբլոս Բանկ Արմենիան և Հայաստանի արտահանման ապահովագրական գործակալությունը ստորագրել են համագործակցության համաձայնագիր
ԵՐԵՎԱՆ, 10 դեկտեմբերի./ԱՌԿԱ/. Բիբլոս Բանկ Արմենիան և Հայաստանի արտահանման ապահովագրական գործակալությունը (ՀԱԱԳ) ստորագրեցին համագործակցության համաձայնագիր` ապահովագրության միջոցով նախաարտահանման և հետարտահանման ֆինանսավորման հնարավորություններ ստեղծելու վերաբերյալ, հաղորդում են բանկի մամուլի ծառայությունից։
Այս համագործակցությունը կառաջարկի արդյունավետ լուծումներ արտահանող ընկերություններին՝ անկախ նրանից, թե արտահանողը փոքր կազմակերպություն է, թե խոշոր ձեռնարկություն: Բիբլոս Բանկ Արմենիան հնարավորություն կունենա արտահանողին տրամադրել արտահանման ֆինանսավորում, որը կապահովագրվի ՀԱԱԳ-ի կողմից: Գործընկերության համաձայնագիրը հնարավորություն է տալիս միավորել ջանքերը ՀՀ ռեզիդենտ տնտեսվարող սուբյեկտների արտահանման և արտադրման ծավալները մեծացնելու և համատեղ ֆինանսական ծառայություններ ներկայացնելու գործում։
«Ուրախ ենք, որ այս համագործակցության շնորհիվ մեր հաճախորդները հնարավորություն կունենան ընդլայնել հայկական ապրանքների արտահանման ծավալները»,– նշել է «Բիբլոս Բանկ Արմենիա» ՓԲԸ-ի գլխավոր գործադիր տնօրեն Հայկ Ստեփանյանը։
«Վստահ եմ, որ Բիբլոս Բանկ Արմենիա ՓԲԸ-ի հետ համագործակցությունը թույլ կտա էլ ավելի մեծացնել ՀԱԱԳ ծառայությունների պահանջարկը, ինչը կնպաստի արտահանողների մրցունակության բարձրացմանը և արտահանման հնարավորությունների ընդլայնմանը», – իր հերթին նշել է «Հայաստանի արտահանման ապահովագրական գործակալություն» ԱՓԲԸ-ի գործադիր տնօրենի ժամանակավոր պաշտոնակատար Արմեն Խաչատրյանը։Ընկերությունների գործունեությունը վերահսկվում է ՀՀ կենտրոնական բանկի կողմից։–0–
