Թվայնացումն ու փոխակերպումը ոչ թե ցանկալի, այլ պարտադիր օրակարգ է․ Ամերիաբանկ
ԵՐԵՎԱՆ, 4 ապրիլի․/ԱՌԿԱ/․ Ամերիաբանկի մանրածախ բանկինգի տնօրեն Արման Բարսեղյանը հայտարարեց, որ մոտ 7-8 տարի բանկը գտնվում է թվային փոխակերպման գործընթացում, որից վերջին 2-3 տարիները շատ ինտենսիվ են եղել։
«Մեր պատկերացմամբ, դասական բանկերը և, մասնավորապես, մեր բանկը դարձել է ֆինտեխ ընկերություն։ Գործարքների 90%-ն իրականացվում է մասնաճյուղերից դուրս, վաճառքի և ծառայությունների 50%-ից քիչ պակասը՝ թվային եղանակով, սակայն այս տեմպը ևս արագ փոխվում է։ Մենք ակնկալում ենք, որ մինչև տարեվերջ վաճառքների ավելի քան 60%-ը կիրականացվի մասնաճյուղերից դուրս»,- ասաց Բարսեղյանը Doing Digital 2024 ֆորումում։
Նա նաև նշեց, որ փոքր և միջին բիզնեսին տրամադրվող վարկերի 95%-ը թվային է, իսկ մանրածախ վարկերի միայն 5%-ն ունի թղթային բաղադրիչ:
Բարսեղյանը հայտարարեց, որ թվային փոխակերպումը պարտադիր ցուցանիշ է, առանց որի ցանկացած բիզնեսի համար դժվար կլինի գրանցել բարձր ցուցանիշներ։ Նա հավելեց, որ օգտատերերի ադապտացիան տեղի է ունենում ավելի արագ, քան ակնկալում էին բանկում։–0–
