Նախարար Վահան Մարտիրոսյանը ընդունել է «Softline» ընկերության ներկայացուցիչներին
ԵՐԵՎԱՆ, 11 դեկտեմբերի. /ԱՌԿԱ/. ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը դեկտեմբերի 11-ին ընդունել է «Softline» ընկերության նախագահ Իգոր Բորովիկովին և Հայաստանում «Softline»-ի գլխավոր տնօրեն Սարգիս Հարությունյանին, հայտնում է նախարարության մամուլի ծառայությունը։
Ընկերության ներկայացուցիչները նախարարին ներկայացրել են իրենց կողմից Հայաստանում «Data center» (տվյալների մշակման կենտրոն) հիմնելու հնարավորությունը։
«Վահան Մարտիրոսյանը նշել է, որ նախարարությունը տեխնիկապես պատրաստ է քննարկելու ներկայացված ծրագրի դրույթներն ու մանրամասները։ Նախարարը համապատասխան վարչության մասնագետներին հանձնարարել է որոշակի ուսումնասիրություններից և ներկայացված բիզնես պլանին ծանոթանալուց հետո առավել ակտիվ շարունակել քննարկումները տեխնիկական բնույթի հարցերի շուրջ», - նշվում է տարածած հաղորդագրությունում: -0-
