Նոր պարտատոմսեր. եկամուտները ավելացնելու նոր հնարավորություն Ինեկոբանկից
ԵՐԵՎԱՆ, 15 նոյեմբերի. /ԱՌԿԱ/. Ինեկոբանկը 2018թ. նոյեմբերի 15-ից հրապարակային առաջարկի միջոցով սկսում է տեղաբաշխել 5 մլն դոլարի և 1,5 մլրդ դրամի 3 տարեկան արժեկտրոնային, ոչ փաստաթղթային պարտատոմսեր։ Պարտատոմսերի արժեկտրոնը կազմում է 5,25% ԱՄՆ դոլարի և 9,75% ՀՀ դրամի համար, հայտնում են բանկի մամուլի ծառայությունից։
Բանկում նշել են, որ 2-րդ և 3-րդ թողարկման պարտատոմսերի անվանական արժեքը համապատասխանաբար կազմում է 100 դոլար և 10 000 դրամ։ Արժեկտրոնների վճարումը կկատարվի կիսամյակային պարբերականությամբ՝ 6 վճարմամբ։
Նշվում է նաև, որ պարտատոմսերի թողարկմամբ Բանկը հաճախորդներին հնարավորություն է ընձեռում իրենց ներդրումները դիվերսիֆիկացնելու, ինչպես նաև ավելացնելու եկամուտները` օգտվելով ոչ միայն ավանդային կամ խնայողական հաշիվներից, այլեւ` պարտատոմսերից։
«Պարտատոմսը ազատ միջոցների ներդրման բավականին ճկուն գործիք է, ինչը ցանկացած պահի հնարավոր է վաճառել երկրորդային շուկայում եւ, ի տարբերություն այլ ներդրումային գործիքների, որոնց դեպքում ժամկետից շուտ մարումը ենթադրում է կուտակված տոկոսների վերահաշվարկ, ապահովել ընթացիկ շուկայական եկամտաբերությունը։ Պարտատոմսի արժեկտրոնային եկամուտը էականորեն բարձր է բանկի կողմից առաջարկվող այլ գործիքներից, այս առավելությունները անհամեմատ գրավիչ են դարձնում դրանք։ Պարտատոմսերը ցուցակվելու են բորսայում և ունենալու են մարքեթ մեյքեր, որը պարտավորվում է ապահովել պարտատոմսի առքն ու վաճառքը պարտատոմսի շրջանառության ամբողջ ընթացքում։ Ինեկոբանկը կապիտալի շուկա իր մուտքն ազդարարել էր հունիսին թողարկված դոլարային պարտատոմսերով, որոնք այժմ ցուցակված են և շրջանառվում են Նասդաք ՕԷՄԷՔՍ Արմենիա բորսայում։ Երկու նոր թողարկումները գալիս են ապահովելու մեր հաճախորդների կողմից ներկայացված պահանջարկը, քանի որ եղան հաճախորդներ, որոնք չհասցրեցին ներդրում կատարել մեր կողմից թողարկված առաջին տրանշում, ինչպես նաև հարցումներ ստացանք դրամային պարտատոմսերի մասին»,- նշել է Ինեկոբանկի Ֆինանսական տնօրեն Հայկ Ոսկանյանը։
Տեղաբաշխման ավարտից հետո պարտատոմսերը կցուցակվեն «ՆԱՍԴԱՔ ՕԷՄԷՔՍ Արմենիա» կորպորատիվ պարտատոմսերի բորսայական հարթակում: Նախատեսվում է տեղաբաշխումը ավարտել 2019 թվականի փետրվարի 15-ին։
«Ծրագրային ազդագրի և թողարկման վերջնական պայմանների էլեկտրոնային տարբերակները տեղադրված են «Ինեկոբանկ» ՓԲԸ-ի պաշտոնական ինտերնետային կայքէջում, իսկ թղթային տարբերակները ներդրողները կարող են ձեռք բերել՝ այցելելով «Ինեկոբանկ» ՓԲԸ-ի Գլխամասային գրասենյակ՝ ք.Երեւան, Թումանյան 17 հասցեով», - նշվում է տարածած հաղորդագրությունում:
«Ինեկոբանկ» ՓԲԸ–ն այսօր Հայաստանում գործող միակ թվային բանկն է, որն ապահովում է թվային ծառայությունների ամբողջական համալիր ֆիզիկական անձանց համար։ Բանկի թվային լուծումներից օգտվում է ավելի քան 150 հազար հաճախորդ։ Միաժամանակ բանկը շարունակում է ներդնել ու զարգացնել հարմար և անվտանգ բանկային թվային ծառայություններ։ Բանկը նպատակ ունի միավորել բոլոր ֆինանսական գործիքները մեկ անվտանգ միջավայրում, որը թույլ կտա իրականացնել փոխանցումներ, ձևակերպել ավանդներ, ստանալ վարկեր և անմիջապես սմարթֆոնից կատարել վճարումներ տարբեր ծառայությունների համար։-0-
