ՀԾԿՀ-ն հաստատել է Հայկական ԱԷԿ-ի 2026 թ․-ի 9,2 մլն դոլար ծավալով ներդրումային ծրագիրը
ԵՐԵՎԱՆ, 13 մայիսի․/ԱՌԿԱ/․ Հայաստանի Հանրային ծառայությունները կարգավորող հանձնաժողովը (ՀԾԿՀ) չորեքշաբթի կայացած նիստում հաստատել է «Հայկական ատոմային էլեկտրակայան» փակ բաժնետիրական ընկերության (ՀԱԷԿ) 2026 թ․-ի ներդրումային ծրագրին՝ 3 404,5 մլն դրամ ծավալով՝ առանց ավելացված արժեքի հարկի։
«Ներդրումային ծրագիրն ուղղված է «ՀԱԷԿ» ՓԲԸ-ի տեխնիկական վերազինմանն ու արդիականացմանը, ինչպես նաև կայանի շահագործման կազմակերպման համար անհրաժեշտ այլ ուղղություններով իրականացվելիք ներդրումներին»,- նշված է ՀԾԿՀ Facebook-յան էջում տարածած հաղորդագրության մեջ։
ՀԱԷԿ-ն ապրիլի 1-ից ժամանակավորապես անջատվել է էներգահամակարգից՝ կայանի շահագործման ժամկետի երկարաձգման ծրագրի և կապիտալ պլանային-նախազգուշական վերանորոգման (ՊՆՎ) կապակցությամբ, որը կտևի 5 ամիս։
Հայաստանի իշխանությունները հայտարարել են, որ արդեն կողմնորոշվել են ապագա ատոմային կայանի տիպի հարցում՝ մոդուլային, իսկ կոնկրետ մոդելը կընտրվի մինչև 2027 թվականի վերջը։ Մեծամորի ԱԷԿ-ի գործող երկրորդ էներգաբլոկի շահագործման ժամկետը երկարաձգվում է մինչև 2036 թվականը։
Հայկական ԱԷԿ–ի մասին
Հայկական ԱԷԿ-ը՝ Հարավային Կովկասի տարածաշրջանում միակ ատոմային էլեկտրակայանը, գտնվում է Մեծամոր քաղաքի մոտ՝ Երևանից մոտ 30 կմ դեպի արևմուտք։ Կայանը երկրի էլեկտրաէներգիայի հիմնական աղբյուրներից մեկն է՝ ապահովելով ընդհանուր արտադրության մինչև 40%-ը։
Գործող էներգաբլոկի շահագործման ժամկետը երկարաձգվել է մինչև 2026 թվականը, և աշխատանքներ են տարվում այն ևս 10 տարով կրկնակի երկարաձգելու ուղղությամբ։
Հայաստանի իշխանությունները ծրագրում են 8–10 տարվա ընթացքում կառուցել նոր ատոմակայան։ Ներկայումս ուսումնասիրվում են տարբեր տարբերակներ և ԱՄՆ-ի, Ֆրանսիայի, Չինաստանի, Ռուսաստանի ու Հարավային Կորեայի գործընկերների փորձը։
Ավելի վաղ «Ռոսատոմի» գլխավոր տնօրենի առաջին տեղակալ Կիրիլ Կոմարովը, պատասխանելով «ԱՌԿԱ» գործակալության հարցին, հայտարարել էր, որ կորպորացիան կարող է Հայաստանին առաջարկել 50-ից մինչև 1000 ՄՎտ հզորությամբ միջուկային ռեակտորներ։ Նրա խոսքով՝ կա հնարավորություն, մասնավորապես, 50 ՄՎտ հզորությամբ բլոկներից «հավաքել» ցանկացած հզորության ռեակտոր։
