Փաշինյանն անդրադարձել է գազի հնարավոր թանկացման դեպքում Հայաստանի այլընտրանքներին
ԵՐԵՎԱՆ, 11 սեպտեմբերի․/ԱՌԿԱ/․ ՀՀ վարչապետ Նիկոլ Փաշինյանն անդրադարձել է գազի հնարավոր թանկացման դեպքում Հայաստանի այլընտրանքներին՝ մեկնաբանելով ՌԴ նախագահ Վլադիմիր Պուտինի՝ Բիշքեկում արված այն ակնարկին, թե ԵԱՏՄ-ի անդամությունից զրկվելով Հայաստանը կարող է զրկվել գազի արտոնյալ սակագնից։
«Կոնկրետ իրավիճակները կարող են ունենալ կոնկրետ պատասխաններ։ Եթե նման իրավիճակ լինի թանկացնելու, մենք էլ կնայենք՝ ինչ կարող ենք թանկացնել, կամ ինչ կա, որ մինչև հիմա ձրի է, դրանից հետո կարող է համամասնորեն գին առաջանալ։ Մենք նորմալ ենք վերաբերվում։ Հանգիստ, աշխատանքային մթնոլորտում պետք է և կարող ենք քննարկել»,– ասաց Փաշինյանը լրագրողների հետ ճեպազրույցի ժամանակ։
Նա ընդգծեց, որ անկախ նրանից՝թանկացում կլինի, թե ոչ, Հայաստանը գնալու է դիվերսիֆիկացիայի ճանապարհով։
«Եթե կա հնարավորություն երկրորդ տեղից գազ բերելու կամ երկրորդ տեղից բերելու ավելի շատ, գնալու ենք այդ ճանապարհով: Եթե կա հնարավորություն երրորդ տեղից բերելու, գնալու ենք այդ ճանապարհով: Եթե կա հնարավորություն չորրորդ տեղից բերելու, մենք այդ ճանապարհով էլ ենք գնալու: Եթե հնարավորություն կա, որ TRIPP-ով գազամուղ անցնի Հայաստանով, որից մենք այդ թվում տրանզիտային վճարներ կստանանք, այդ ճանապարհով էլ կարող ենք գնալ: Մենք պատկերացնում ենք մեր անելիքը բոլոր սցենարներով»,- նշեց վարչապետը:
Միաժամանակ Փաշինյանը հայտարարեց, որ Հայաստանում գազն էժան չէ։
«Սահմանից մինչև սպառող հասնելու ճանապարհին՝ համեմատած այլ երկրների հետ, Հայաստանում գնի գոյացման ամենամեծ հավելաճն է տեղի ունենում», - ասաց վարչապետը:
Նա նաև ընդգծեց, որ «Գազպրոմ Արմենիա»-ն շահութաբեր ընկերություն է և մեծ շահույթներ է ստանում։
Գազի մատակարարման մասին
2026 թ.-ի մայիսի վերջին ռուսական իշխանությունները զգուշացրել էին Հայաստանին էներգակիրների մատակարարման պայմանների հնարավոր փոփոխության մասին՝ Երևանի՝ եվրաինտեգրման ուղեգծի ֆոնին։ ՌԴ նախագահի մամուլի քարտուղար Դմիտրի Պեսկովը հայտարարել էր, որ Հայաստանի՝ ԵԱՏՄ-ից դուրս գալու դեպքում ռուսական գազի արտոնյալ գինը կարող է դառնալ շուկայական։
Բացի այդ, ՌԴ էներգետիկայի նախարար Սերգեյ Ցիվիլյովը հայկական կողմին նամակ էր հղել, որում Մոսկվան զգուշացրել էր 2013 թ.-ի դեկտեմբերի 2-ի՝ գազի, նավթամթերքների և չմշակված ադամանդների մատակարարման մասին համաձայնագիրը կասկածի տակ դնելու կամ չեղարկելու հնարավորության մասին՝ Հայաստանի կողմից ԵՄ-ին անդամակցելու գործընթացի շարունակման դեպքում։ Ավելի ուշ Ցիվիլյովը պարզաբանել էր, որ ԵԱՏՄ-ից ԵՄ անցնելիս Ռուսաստանը չի կարողանա գազ մատակարարել գործող գնով։
Ընթացիկ տարվա օգոստոսի վերջին ՀՀ ֆինանսների նախարար Վահե Հովհաննիսյանը հայտարարել էր, որ կառավարությունը հաշվարկներ է կատարել ռուսական գազի գների բարձրացման հնարավոր հետևանքների վերաբերյալ և մտադրված է այդ հաշվարկները ներառել իր ռիսկերի գնահատման համակարգում։
«Գազպրոմ Արմենիա» ՓԲԸ-ն ռուսական «Գազպրոմ» հոլդինգի 100%-անոց դուստր ձեռնարկությունն է, ներքին սպառման համար Ռուսաստանից Հայաստան բնական գազի մենաշնորհային մատակարարը։
Այսօրվա դրությամբ Հայաստանի համար սահմանին ռուսական գազի գինը կազմում է 165 ԱՄՆ դոլար՝ 1 հազար խորանարդ մետրի դիմաց։ Այս գինը գործում է 2019 թ.-ի հունվարի 1-ից և, համաձայն գործող հայ-ռուսական համաձայնագրերի, չպետք է փոխվի մինչև 2031 թ.-ի վերջը։
