Գլխավոր դատախազությունը պահանջում է առ ոչինչ ճանաչել ՝ Գագիկ Ծառուկյանին պատկանող «Արարատցեմենտի» մասնավորեցումը
ԵՐԵՎԱՆ, 5 հունիսի․/ԱՌԿԱ/․ Գլխավոր դատախազությունը հայցադիմում է ներկայացրել Վարչական դատարան՝ «Մուլտի Գրուպ»-ի նախագահ և «Բարգավաճ Հայաստան» կուսակցության առաջնորդ Գագիկ Ծառուկյանին պատկանող «Արարատցեմենտ» ընկերության մասնավորեցման գործընթացը առ ոչինչ ճանաչելու պահանջով։
Մայիսի 20-ին ՀՀ վարչապետ Նիկոլ Փաշինյանը հայտարարել էր, որ կառավարությունը գրություն է ստացել ՀՀ Դատախազությունից, որ Արարատի ցեմենտի գործարանը ենթակա է պետականացման, և առաջիկայում գործարանում կնշանակվի կառավարիչ:
«Դատախազությունը, պետական (համայնքային) շահերի պաշտպանության հայց հարուցելու լիազորության շրջանակում, ուսումնասիրել է ՀՀ Կառավարության 2002 թվականի սեպտեմբերի 12-ի թիվ 1465-Ա որոշմամբ օտարված՝ «Արարատցեմենտ» ընկերության մասնավորեցման գործընթացը: Օտարման գործընթացում հայտնաբերված խախտումների հիմքով՝ Դատախազությունը հայցադիմում է ներկայացրել Վարչական դատարան՝ ՀՀ կառավարության վերոնշյալ որոշումն առ ոչինչ ճանաչելու և հետևանքները վերացնելու պահանջով», - նշված է հաղորդագրության մեջ։
Գլխավոր դատախազության հայտարարությունը
Գլխավոր դատախազությունը «Արարատցեմենտ» ընկերության մասնավորեցման գործընթացում հայտնաբերել էր մի շարք խախտումներ։ Ուսումնասիրությամբ ձեռք բերված առերևույթ հանցագործության հատկանիշներ պարունակող փաստերի կապակցությամբ դատախազը 2026 թ․-ի մայիսի 5-ին հանցանքի մասին հաղորդում է ներկայացրել Հակակոռուպցիոն կոմիտե:
Հաղորդման հիման վրա 2026 թ․-ի մայիսի 7-ին նախաձեռնվել է քրեական վարույթ՝ Քրեական օրենսգրքի 441-րդ հոդվածի 2-րդ մասի 5-րդ կետի (պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որն անզգուշությամբ առաջացրել է այլ ծանր հետևանք) (2 դրվագ) և 296-րդ հոդվածի 3-րդ մասի 3-րդ կետի (առանձնապես խոշոր չափերով փողերի լվացումը) հատկանիշներով։
Վարույթի քննությանը զուգահեռ՝ Դատախազությունը 2026 թ․-ի մայիսի 5-ին գրություն է հասցեագրել ՀՀ Կառավարություն՝ առաջարկելով քննարկել ընկերությունում առկա խախտումները և դրանց հետևանքները վերացնելու նպատակով պատշաճ վարչարարություն իրականացնելու, այդ թվում, օրինակ, ընկերությունում ժամանակավոր կառավարիչ նշանակելու նպատակահարմարությունը:
Մասնավորեցման մանրամասները
Գլխավոր դատախազությունից հիշեցրել են, որ 2001 թվականին շվեյցարական Holcim LTD ընկերությունը ճանաչվել «Holcim LTD» կազմակերպությունը, սակայն ավեի ուշ այն առանց պատճառաբանությունների մերժել է ներդրումային ծրագիրը:
2002 թ․-ին ձեռնարկության բաժնետոմսերը սեփականաշնորհվել են ուղղակի վաճառքով մասնավորեցվել են բելգիական «Ռոբերտո» ընկերությանը՝ 200 հազար դոլարով։ Ընդ որում, ընկերության հիմնադիրներն են եղել ՀՀ քաղաքացիներ Ազատ, Ռոբերտ և Ռոման Մուրադյանները, իսկ դրա կառավարիչ էր նշանակվել Վահագն Գուլոյանը՝ Գագիկ Ծառուկյանի ընտանիքի ազգականը։
Մասնավորեցումից վեց ամիս անց Գագիկ Ծառուկյանը նշանակվել է «Ռոբերտո»-ի միանձնյա կառավարիչ։ 2003 թվականին բելգիական ընկերությունը սկսել է լուծարումը, որն ավարտվել է 2008 թվականին։
Գագիկ Ծառուկյանի ներկայացուցչի արձագանքը
«Բարգավաճ Հայաստան» կուսակցության առաջնորդ Գագիկ Ծառուկյանի մամուլի քարտուղար Իվետա Տոնոյանը, անդրադառնալով իրավիճակին,հայտարարել է,որ իրենք իրավական դաշտում հետամուտ են լինելու այդ հարցին:
«Մեր երկրի իրավապահ համակարգը լցված է 1 անձի ցուցումով, պատվերով համերգի տրամաբանության շրջանակում իր գործընթացները կազմակերպելու գործելաոճն է որդեգրել։ Դրա համար շատ ցավում եմ», - ասաց Տոնոյանը կուսակցության հրավիրած հրատապ ասուլիսի ժամանակ։
«ԱՌԿԱ» լրատվական գործակալությունը կրկին կապ է հաստատել «Բարգավաճ Հայաստան» կուսակցության հետ՝ մեկնաբանություն ստանալու համար։
