Յունիբանկը՝ «Ալաշկերտ» ֆուտբոլային ակումբի ոսկե հովանավոր
ԵՐԵՎԱՆ, 8 օգոստոսի․/ԱՌԿԱ/․ Յունիբանկը և «Ալաշկերտ» ֆուտբոլային ակումբը կնքել են երկարաժամկետ համագործակցության համաձայնագիր։
Համագործակցության շրջանակում Յունիբանկը դարձել է ակումբի ոսկե հովանավորը՝ աջակցելով «Ալաշկերտ»-ին Հայաստանի առաջնության ընթացիկ մրցաշրջանում, հաղորդում է Յունիբանկի մամուլի ծառայությունը։
Յունիբանկը երկար տարիներ ակտիվորեն նպաստում է պրոֆեսիոնալ սպորտի զարգացմանը և իրականացնում է հովանավորության լայն ծրագիր, որն ընդգրկում է ֆուտբոլ, ֆուտզալ, ըմբշամարտ, հեծանվասպորտ և ձյուդո։
Բանկն աջակցում է մարզիկներին իրենց նպատակներին հասնելու ճանապարհին՝ ոգեշնչելով երիտասարդ սերնդին՝ առողջ և ակտիվ կենսակերպի մշակույթի ձևավորման գործում։
«Ալաշկերտ» ՖԱ-ի աջակցությունն այս ռազմավարության կարևոր մաս է։ Համագործակցությունը միտված է ակումբի հետագա զարգացմանը և նոր մարզական հաջողությունների համար պայմանների ստեղծմանը։
«Ալաշկերտ» ֆուտբոլային ակումբը հայկական ֆուտբոլի առաջատարներից է՝ Հայաստանի քառակի չեմպիոն, երկրի գավաթակիր և եռակի սուպերգավաթակիր։
