Հայաստանում տնտեսական ակտիվությունը 7 ամսում տարեկան կտրվածքով ավելացել է 9,6%–ով
ԵՐԵՎԱՆ, 26 օգոստոսի․/ԱՌԿԱ/․ Հայաստանի տնտեսական ակտիվության ցուցանիշը, ըստ նախնական տվյալների, 2024 թվականի հունվար-հուլիսին, 2023 թվականի նույն ժամանակահատվածի համեմատ, աճել է 9,6 տոկոսով, հայտնում է հանրապետության Ազգային վիճակագրական կոմիտեն։
Միաժամանակ, այս տարվա հուլիսին, նախորդ տարվա հուլիսի համեմատ, տնտեսական ակտիվության ցուցանիշն աճել է 6,2%-ով, իսկ նույն տարվա հունիսի համեմատ՝ 5,6%-ով։
Ըստ ներկայացված տվյալների՝ այս տարվա յոթ ամիսների արդյունքում աճ է գրանցվել տնտեսության բոլոր ներկայացված ճյուղերում, ագրոհատվածի տվյալները չեն ներկայացվել։
Հաշվետու ժամանակահատվածում արդյունաբերական արտադրանքի ծավալը կազմել է 1 636 156,3 մլն դրամ՝ 2023 թվականի հունվար-հուլիսի համեմատ աճելով 15,7%-ով։ Միաժամանակ հուլիսին տարեկան աճը կազմել է 2,2%, իսկ ամսվա կտրվածքով` 2%:
Շինարարության ծավալը 2024 թվականի 7 ամսում, 2023 թվականի նույն ժամանակահատվածի համեմատ, աճել է 16.1%-ով և կազմել 259 373.5 մլն դրամ։ Հուլիսին տարեկան կտրվածքով այս ցուցանիշն աճել է 17,7%-ով, իսկ ամսական կտրվածքով՝ 11,6%-ով։
Միաժամանակ ներքին առևտրաշրջանառությունն այս տարվա հունվար-հուլիսին կազմել է 3,302,151.0 մլն դրամ, ինչը 21.4%-ով գերազանցում է նախորդ տարվա նույն ժամանակահատվածի ցուցանիշը։ Միաժամանակ հուլիսին, 2023 թվականի հուլիսի համեմատ, աճը կազմել է 14%, իսկ նույն տարվա հունիսի համեմատ՝ 7,3%։
Ըստ վիճակագրական տվյալների՝ ծառայությունների ոլորտի (առանց առևտրի) ծավալը հաշվետու ժամանակահատվածում կազմել է 1 841 048,5 մլն դրամ, ինչը 4,5%-ով գերազանցում է նախորդ տարվա նույն ցուցանիշը։ Հուլիսին տարվա կտրվածքով աճը կազմել է 4,9%, իսկ ամսվա կտրվածքով արձանագրվել է 1,7% անկում։
Միջին ամսական անվանական աշխատավարձի վերաբերյալ վիճակագրական ծառայությունը տվյալներ չի ներկայացրել։
Թվեր և կանխատեսումներ Հայաստանի տնտեսության վերաբերյալ
Հայաստանի տնտեսական աճը 2024 թվականի պետբյուջեում նախատեսված է 7 տոկոս։ ՀՀ կենտրոնական բանկն ակնկալում է, որ 2024 թվականին երկրի տնտեսական աճը կլինի 6,1-6,8 տոկոսի սահմանում։
