Հնդկաստանը պետք է հույսը դնի իր սեփական տնտեսական ներուժի վրա ներկայիս համաշխարհային անկայունության պայմաններում. վարչապետ

ԵՐԵՎԱՆ, 4 օգոստոսի․/ԱՌԿԱ/․ Այսօրվա մարտահրավերների ֆոնին Հնդկաստանը պետք է զգոն լինի և հույսը դնի իր սեփական տնտեսական ներուժի վրա, շաբաթ հայտարարել է վարչապետ Նարենդրա Մոդին, հաղորդում է Finmarket-ը։

«Ամենուրեք տիրում է համաշխարհային անկայունության մթնոլորտ։ Բոլոր երկրները կենտրոնացած են իրենց շահերի պաշտպանության վրա։ Հնդկաստանը կդառնա աշխարհի երրորդ տնտեսությունը, ուստի Հնդկաստանը պետք է զգոն լինի իր տնտեսական շահերի հարցում», - «Hindustan Times»-ը մեջբերում է Մոդիի խոսքերը Վարանասիում կայացած հանրահավաքի ժամանակ։

Վարչապետը կոչ արեց բիզնես համայնքին և քաղաքացիներին աջակցել տեղական արտադրությանը: «Մենք կգնենք միայն հնդիկների կողմից պատրաստված իրեր: Մենք պետք է աջակցենք տեղական արտադրությանը», - ընդգծել է Մոդին՝ հավելելով, որ բիզնես ոլորտը պետք է առաջնահերթություն տա Հնդկաստանում արտադրությանը, հատկապես միջազգային դժվարին իրավիճակում:

Կայքը նշում է, որ Մոդին չի անդրադարձել ԱՄՆ նախագահ Դոնալդ Թրամփի՝ ավելի վաղ Հնդկաստանի տնտեսության վերաբերյալ հնչեցրած բացասական գնահատականին։ Բացի այդ, Մոդին նախազգուշացում է արել Պակիստանին և ասել, որ Հնդկաստանը վճռական պատասխան կտա նրա ագրեսիվ գործողություններին։ «BrahMos հրթիռներն այժմ հավաքվում են Լաքնաուում։ (...) Եթե Պակիստանը ևս մեկ չարագործության դիմի, Ուտար Պրադեշում պատրաստված հրթիռները կոչնչացնեն ահաբեկիչներին», - ասել է նա։

Հուլիսի 30-ին Թրամփը հայտարարել է, որ Միացյալ Նահանգները 25 տոկոս մաքսատուրք կսահմանի հնդկական ապրանքների արտահանման վրա։ Նա հավելել է, որ Հնդկաստանը «միշտ իր ռազմական տեխնիկայի ճնշող մեծամասնությունը գնել է Ռուսաստանից և Չինաստանի հետ միասին Ռուսաստանի ամենամեծ էներգակիր գնորդներից մեկն է»։ Հետևաբար, շեշտել է Թրամփը, «Հնդկաստանը կպատժվի» այս քաղաքականության համար՝ սկսած օգոստոսի 1-ից։

Այնուհետև Թրամփը Truth Social-ում հանդես եկավ հայտարարությամբ, որտեղ Հնդկաստանի տնտեսությունն անվանել է «մեռած»։ Թրամփը նշել է, որ ԱՄՆ-ն շատ քիչ տնտեսական կապեր ունի Հնդկաստանի հետ՝ բարձր մաքսատուրքերի պատճառով, որոնք «աշխարհում ամենաբարձրերից են»։ Բացի դրանից, Թրամփը նաև հույս է հայտնել, որ Հնդկաստանը կդադարի ռուսական նավթ գնել։

Սակայն Հնդկաստանի արտաքին գործերի նախարարությունը հերքել է այն ենթադրությունները, որ Հնդկաստանի և ԱՄՆ-ի հարաբերություններում լարվածություն կա հնդկական ապրանքների վրա 25% մաքսատուրքերի սահմանումից հետո: Bloomberg-ը, հղում անելով աղբյուրին, հայտնել է, որ Դելին հույս ունի շարունակել երկխոսությունը ԱՄՆ-ի հետ առևտրային հարցերի շուրջ և սպասում է ԱՄՆ պատվիրակությանը օգոստոսի 25-ին։