Ձեռք բերված նախնական բավականաչափ տվյալներ վկայում են Կուտոյանի ինքնասպանության մասին. գլխավոր դատախազ
ԵՐԵՎԱՆ, 19 հունվարի./ԱՌԿԱ/. ՀՀ գլխավոր դատախազ Արթուր Դավթյանը նշել է, որ ՀՀ ԱԱԾ նախկին տնօրեն Գեորգի Կուտոյանի մահվան վերաբերյալ արդեն ապահովվել է որոշակի հրապարակայնություն։
«Իսկապես այս պահին քննությամբ ձեռք բերված նախնական բավականաչափ տվյալներ վկայում են ինքնասպանության մասին։ Ձեզ հայտնի է, որ ինքնասպանությանը հասցնելու հատկանիշներով հարուցվել է քրեական գործ, բայց մահվան ելքով ցանկացած դեպքին բնորոշ բոլոր վարկածները ամենայն խորությամբ ստուգվելու են», – նշել է Դավթյանն այսօր լրագրողների հետ զրույցում։
Լրագրողների այն հարցին, թե ՔԿ–ի տվյալներով Կուտոյանը դեկտեմբերին է կրակել իր տանը և արդյոք այս ամենում նա խնդիրներ չի տեսնում` գլխավոր դատախազը նշել է. «Եթե խնդիրներ չլինեն, չենք ունենա հարուցված քրեական գործ, և չէի խոսի ես այսօր լայնածավալ և խորը քննության մասին»։
«Բայց նաև առավել շահարկումներից խուսափելու համար ես այս պահին կրկին անգամ հաստատում եմ, որ ձեռք են բերվել ինքնասպանության մասին վկայող բավականաչափ տվյալներ», – ընդգծել է Արթուր Դավթյանը` հավելելով, որ բոլոր ուղղություններով, բոլոր վարկածներով պատշաճ քննություն կիրականացվի։
«Քննության ընթացքում որոշակի, էական հանգամանքների ձեռք բերվելու, առավել ևս քննության արդյունքների մասին մենք բոլորս, անձամբ ես ձեզ հետ խոսելու առիթ կունենամ», – նշել է գլխավոր դատախազ Արթուր Դավթյանը։
Հիշեցնենք, որ հունվարի 17–ին հայտնի է դարձել, որ Երևանի Պարույր Սևակի փողոցի բնակարաններից մեկում հայտնաբերվել է ԱԱԾ նախկին պետ Գեորգի Կուտոյանի դին՝ հրազենային վիրավորումով: ՔԿ–ի հաղորդմամբ, հարուցվել է քրեական գործ ինքնասպանությանը հասցնելու հատկանիշներով։–0–
Ծանոթացեք լուրերին առաջինն ու քննարկեք դրանք մեր Telegram-ում
22:00 19.01.2020
