Դամասկոսում ավտոբուսի վրա ընկած ռումբի հետևանքով երկու հայ երեխաներ են զոհվել

ԵՐԵՎԱՆ, 12 նոյեմբերի. /ԱՌԿԱ/. Երկու հայ դպրոցական է զոհվել նախօրեին Դամասկոսի «Բաբ շարկ» քրիստոնեական թաղամասի դպրոցական ավտոբուսի վրա ընկած ռումբի հետևանքով, հաղորդում է «Նովոստի–Արմենիա» գործակալությունը` հղում անելով «Եռագույն» արևմտահայկական տեղեկատվական պորտալին։

Ողբերգական միջադեպի հետևանքով զոհվել են առաջին դասարանի աշակերտ Հովհաննես Ատոխանյանը և երրորդ դասարանի աշակերտուհի Վանեսա Միխոն։

Սիրիայում 2011թ.–ի մարտից շարունակվում է զինված հակամարտությունը, որն ըստ ՄԱԿ–ի տվյալների, ավելի քան 100 հազար մարդու կյանք է խլել։

Մինչև վերջերս Սիրիայի հայ համայնքը շուրջ 100 հազարի էր հասնում: Հայերը զգալի դեր են խաղում Սիրիայի սոցիալական, քաղաքական և մշակութային կյանքում։ Ավանդաբար Սիրիայի հայ համայնքը Սփյուռքի հզոր համայնքներից մեկն է համարվում։ Հայերի մեծ մասը բնակվում է Հալեպում (ավելի քան 60 հազար մարդ), Դամասկոսում, Լաթակիայում և այլ քաղաքներում։ –0–

Ծանոթացեք լուրերին առաջինն ու քննարկեք դրանք մեր Telegram-ում

16:05 12.11.2013