Միրզոյան․ Հայաստան-Թուրքիա հարաբերություններում կա շատ առողջ երկխոսություն
ԵՐԵՎԱՆ, 4 հունիսի․/ԱՌԿԱ/․ ՀՀ ԱԳ նախարար Արարատ Միրզոյանը հայտարարել է, որ Հայաստան-Թուրքիա հարաբերություններում կա շատ առողջ երկխոսություն։
«Կան նաև պայմանավորվածություններ, որոնցից հիմնականները, ցավոք, դեռ կյանքի չեն կոչվել՝ պայմանավորված 3-րդ գործոններով։ Հայաստանի ակնկալիքն է Թուրքիայից, որ պայմանավորվածություններն իրականանան։ Մենք պատրաստ ենք շարունակել այս շատ առողջ երկխոսությունը»,- նշեց Միրզոյանը ԱԺ–ում 2023թ․–ի բյուջեի կատարողականի քննարկման ժամանակ։
Հայ–թուրքական երկխոսության մասին
Հայաստանի և Թուրքիայի միջև դիվանագիտական հարաբերություններ չկան 1991 թվականից, իսկ պետական սահմանը փակ է 1993 թվականից՝ Անկարայի նախաձեռնությամբ։ Խնդրահարույց հարցերի թվում է Անկարայի դժգոհությունը Հայոց ցեղասպանության միջազգային ճանաչման գործընթացից, որն առաջ է մղում Հայաստանը։
2021 թվականի դեկտեմբերին Հայաստանն ու Թուրքիան նշանակեցին հայ-թուրքական հարաբերությունների կարգավորման իրենց բանագնացներին՝ ՀՀ Ազգային ժողովի փոխխոսնակ Ռուբեն Ռուբինյանին և փորձառու դիվանագետ, ԱՄՆ-ում Թուրքիայի նախկին դեսպան Սերդար Քըլըչին։
2022 թվականի մարտի 12-ին Անթալիայի դիվանագիտական ֆորումի շրջանակում տեղի ունեցավ Հայաստանի և Թուրքիայի արտաքին գործերի նախարարների հանդիպումը, որի ընթացքում քննարկվեց հարաբերությունների կարգավորման հետագա ընթացքը։ Կողմերը հաստատեցին իրենց պատրաստակամությունն առանց նախապայմանների առաջ մղել այս գործընթացը, որպեսզի այն ավարտվի երկու երկրների միջև հարաբերությունների հաստատմամբ և սահմանների բացմամբ։
2022 թվականի հուլիսի 1-ին Հայաստանի և Թուրքիայի բանագնացները պայմանավորվեցին ապահովել հայ-թուրքական ցամաքային սահմանը հնարավորինս արագ հատելու հնարավորությունը համապատասխանաբար Հայաստան և Թուրքիա այցելող երրորդ երկրների քաղաքացիների համար։ Պայմանավորվածություն է ձեռք բերվել նաև Հայաստանի և Թուրքիայի միջև ուղիղ օդային բեռնափոխադրումների հնարավորինս շուտ մեկնարկի վերաբերյալ։
2023 թվականի սկզբին հայտնի դարձավ, որ վերացվել են Հայաստանի և Թուրքիայի միջև ուղիղ օդային բեռնափոխադրումների խոչընդոտները։
2024 թվականի մարտի 1-ին Հայաստանի և Թուրքիայի արտգործնախարարներ Արարատ Միրզոյանը և Հաքան Ֆիդանը Անթալիայում կայացած հանդիպմանը հաստատել են հարաբերությունների ամբողջական կարգավորման հասնելու իրենց պատրաստակամությունը, ինչպես նաև մտքեր են փոխանակել այդ ուղղությամբ հնարավոր կոնկրետ քայլերի շուրջ։
