ԵԱՀԿ ՄԽ համանախագահները նախատեսում են հանդիպել Հայաստանի և Ադրբեջանի ղեկավարների հետ
ԵՐԵՎԱՆ, 17 հունվարի. /ԱՌԿԱ/. ԵԱՀԿ Մինսկի խմբի համանախագահները նախատեսում են մոտ ժամանակներս հանդիպել Հայաստանի և Ադրբեջանի ղեկավարների հետ: Այդ մասին նշվում է նախօրեին ՀՀ արտաքին գործերի նախարարի պաշտոնակատար Զոհրաբ Մնացականյանի և Ադրբեջանի արտգործնախարար Էլմար Մամեդյարովի հանդիպման անփոփ հայտարարությունում:
Հունվարի 16-ին Փարիզում ԵԱՀԿ Մինսկի խմբի համանախագաներ Իգոր Պոպովի, Ստեֆան Վիսկոնտիի, Էնդրյու Շոֆերի միջնորդությամբ և մասնակցությամբ տեղի ունեցավ Հայաստանի արտաքին գործերի նախարարի պաշտոնակատար Զոհրաբ Մնացականյանի հանդիպումը Ադրբեջանի ԱԳ նախարար Էլմար Մամեդյարովի հետ: Հանդիպմանը մասնակցում էր նաև ԵԱՀԿ գործող նախագահի անձնական ներկայացուցիչ Անջեյ Կասպրչիկը:
«Ֆրանսիայի Հանրապետության Եվրոպայի և արտաքին գործերի նախարարության պետքարտուղար Ժան-Բատիստ Լեմուան ամփոփել է բանակցությունների արդյունքները մասնակիցների հետ: Համանախագահներին ընդունել են Ելիսեյան պալատում, որտեղ տեղեկացրել են նախագահ Էմանուիլ Մակրոնի առաջատար դիվանագիտական խոհրդատուներին հանդիպման արդյունքների մասին», - նշվում է հայտարարությունում:
Մասնակիցները երախտագիտությունն են հայտնել երկու երկրների ԱԳՆ ղեկավարներին գործադրվող ջանքերի համար՝ ուղղված ինտենսիվ բանակցություններին նպաստող և արդյունքներ արձանագրելուն միտված մթնոլորտի պահպանմանը:
Նախարարները քննարկել են Ղարաբաղյան հակամարտության կարգավորման հետ կապված հարցերի լայն շրջանակ և պայմանավորվել են կոնկրետ միջոցառումներ ձեռնարկել` բնակչությանը խաղաղությանը նախապատրաստելու համար:
Հանդիպման ընթացքում համանախագահները երկու նախարարների հետ քննարկել են բանակցային գործընթացի այս փուլի համար հիմնական սկզբունքներն ու չափորոշիչները:
Նախարարներն ու համանախագահները քննարկել են Հայաստանի և Ադրբեջանի առաջնորդների միջև հնարավոր հանդիպում կազմակերպելու ուղղությամբ հաջորդ քայլերը՝ բանակցությունների դինամիկային ուժեղ ազդակ հաղորդելու համար:
Նշվում է նաև, որ համանախագահներն ընդգծել են հնարավոր փոխշահավետ նախաձեռնությունների կարևորությունը՝ ուղղված տարածաշրջանի տնտեսական ներուժի իրականացմանը:
Համանախագահները նախատեսում են մոտ ժամանակներս հանդիպել երկու երկրների ղեկավարների հետ:–0–
