Երևանում վնասազերծված հանցախմբի թիրախը կարող էին լինել խորհրդարանն ու վարչապետը

ԵՐԵՎԱՆ, 26 նոյեմբերի. /ԱՌԿԱ/. Երևանում նախօրեին վնասազերծված հանցախումբը ծրագրած է եղել որոշակի գործողություններ իրականացնել Ազգային ժողովում, իսկ մյուս թիրախը եղել է վարչապետ Հովիկ Աբրահամյանը, հաղորդում է «Նովոստի–Արմենիա» գործակալությունը` հղում անելով «Հայկական ժամանակ» թերթին։   

Թերթը, հղում անելով քաղաքական իրազեկ շրջանակներում շրջանառվող տեղեկություններին, գրում է, որ նախօրեին խորհրդարանական լրագրողներն արձանագրել էին, որ Ազգային ժողովի անվտանգության աշխատակիցներն, ի տարբերություն նախորդ օրերի, երբ հսկողություն էին իրականացնում իրենց ամրակցված ատրճանակներով, զինված են եղել ինքնաձիգներով։

Ինչպես նշում է թերթը, ՀՀ պետական պահպանության վարչության պետ Հրաչյա Հարությունյանը, սակայն, հայտարարել է, որ ընդամենը գործողություններ են իրականացնում, դա ոչինչ չի նշանակում, իրավիճակը նորմալ է, մտահոգվելու խնդիր չկա։ –0–