Հայաստանի նախկին նախագահ Սերժ Սարգսյանի թիկնազորի նախկին պետ Վաչագան Ղազարյանը կրկին կալանավորվել է
ԵՐԵՎԱՆ, 15 նոյեմբերի./Նովոստի–Արմենիա/. Հայաստանի նախկին նախագահ Սերժ Սարգսյանի թիկնազորի նախկին պետ Վաչագան Ղազարյանը կրկին կալանավորվել է, «Նովոստի–Արմենիա» գործակալությանը հայտնեց Հատուկ քննչական կոմիտեի մամուլի քարտուղար Մարինա Օհանջանյանը։
«Վճռաբեկ դատարանը բավարարեց դատախազի բողոքը, վերացրեց գրավը և որոշում կայացրեց Ղազարյանին կրկին կալանավորելու մասին»,– ասաց Օհանջանյանը։
Նա միաժամանակ նշեց, որ Ղազարյանն արդեն կալանավորվել է։
Վաչագան Ղազարյանի նկատմամբ ամռանը մեղադրանք է առաջադրվել Բարձրաստիճան պաշտոնատար անձանց էթիկայի հանձնաժողով ներկայացրած հայտարարագրերում իր ունեցած դրամական միջոցների իրական չափի մասին հայտարարագրման ենթակա տվյալները թաքցնելու, ապօրինի հարստանալու համար: Ղազարյանը կալանավորվել էր երկու ամսով, և համաձայն չլինելով դատարանի որոշմանը՝ այն բողոքարկել էր Վերաքննիչ ատյան և ազատ արձակվել 1 միլիարդ դրամ գրավի դիմաց։ -0-
