ՀՀ ԱԳ նախարարն արտահայտվել է Իրաքյան Քուրդիստանում անցկացված հանրաքվեի վերաբերյալ
ԵՐԵՎԱՆ, 27 սեպտեմբերի. /ԱՌԿԱ/. Հայաստանի արտաքին գործերի նախարար Էդվարդ Նալբանդյանն արտահայտվել է Իրաքյան Քուրդիստանում անցկացված անկախության հանրաքվեի վերաբերյալ։
Իրաքյան Քուրդիստանում անկախության հանրաքվե է անցկացվել սեպտեմբերի 25–ին։ Նախնական տվյալներով, ձայների հաշվարկի նախնական արդյունքներով, ավելի քան 90 տոկոսն արտահայտվել է անկախության օգտին։ Հանրաքվեին մասնակցել է մոտ 5.3 մլն մարդ։ Ընտրողները պետք է «այո» կամ «ոչ» ասեին հետևյալ հարցին. «Ցանկանու՞մ եք, որ Քուրդիստան տարածաշրջանը և դրա սահմանից դուրս գտնվող քրդական տարածքները դառնան անկախ պետություն»։
«Հայաստանն ակնկալում է, որ Իրաքի իշխանությունները և Իրաքյան Քուրդիստանի տարածաշրջանային իշխանությունները կխուսափեն լարվածությունից և հնարավորություն կգտնեն լուծելու առկա խնդիրները»,– ասել է Նալբանդյանը։ -0-
